Փաստ ինֆո

«Աղետը հնարավոր էր կանխատեսել, բնապահպանների հետ հաճախ ենք ահազանգել, որ գլոբալ տաքացման հետ լինելու են նման իրավիճակներ, սա պետք է կանխատեսեին, լսեին բնապահպաններին և պատրաստ լինեին»,- «Փաստինֆո»-ի հետ զրույցում ասել է «Մեկ առողջություն» կոալիցիայի համահիմնադիր Սիլվա Ադամյանը՝ խոսելով Տավուշի եւ Լոռու մարզերում արձանագրված ջրհեղեղներին։
Բնապահպանի արձանագրմամբ՝ երկիրը որքան պատրաստ է լինում նման աղետներին, այնքան վնասները քիչ են լինում, իսկ հիմա մենք միայն հետևանքներն ենք վերացնում։

«Ասել ենք, որ գլոբալ տաքացումներից բխող փոփոխությունների հետևանքով տարբեր արհավիրքներ կարող են լինել և Հայաստանը չի կարող դրանցից զերծ մնալ, բայց շատ շատ խնդիրներ կան բնապահպանական, որոնք մնացին չլուծված՝ անտառների հատում, լանջերի քանդում։ Հենց նման խնդիրներն են սա ռաջացնում։ Դա հանգեցրեց նրան, որ ջրի արհավիրքը եկավ և միանգամից մեծ ուժով մտավ մարդկանց տները, բանջարանոցներն ու այգիներն ամբողջը քանդեց, իսկ տիղմը լցրեց, քաղաքներ, բնակավայրեր»,- ասաց բնապահպանը՝ նկատելով, որ դրա հետ վտանգավոր շերտ է լինում՝ կավաշերտը։

Ս.Ադամյանի փոխանցմամբ՝ նկատում են, որ աղետի գոտում ինչ- որ աշխատանք արվում է, մարդկանց էվակուացնում են, տներն են մաքրում, փողոցները, բայց չգիտի, թե արդյոք հասկանո՞ւմ են արդյոք, որ առաջնահերթը բերրի հողի վրայից տիղմը մաքրելն է։

«Իհարկե, մարդկանց պետք է օգնել, բայց հողը ևս առաջին օգնություն է մարդկանց, դա է նրանց ապրուստի հետագա միջոցը, եթե հողը վնասվի, ապա այլևս իրենք այդտեղ ապրել չեն կարող։ Դա չափազանց հրատապ խնդիր է, շատ արագ պետք է անեն»,- ասաց բնապահպանն ու ավելացրեց, որ օրերը տաքանալուն զուգահեռ տիղմի հետ եկած կավաշերտը կկարծրանա, հողի առաջին շերտը կծածակի ու բերրի հողն ամբողջությամբ կոչնչանա։ Բացի այդ՝ վտանգված են նաև գետի ջրի բարձրացած այն հատվածները, որտեղից սնվում էին անասունները և հիմա այդ հատվածները ևս պատված է տիղմով։

«Ընտանի և ոչ ընտանի կենդանիների դիերն արագ պետք է հայտնաբերվեն ու ոչնչացվեն։ Դա վարակ կարող է առաջացնել, վիրուսների պատճառ դառնալ»,- ասաց բնապահպանը։

Անդրադառնալով նաև կառավարման սխալներին՝ Ս.Ադամյանը նկատեց, որ նույնիսկ նոր կառուցվող ճանապարհների նորմերն իրենց չեն արդարացրել։

«Մեր ճանապարհաշինարարությունը ողբալի վիճակում է, չեմ ուզում մարդկանց անուններ տալ, բայց ժամանակին մոնիտորինգ ենք արել Հյուսիս–Հարավի ծրագիրը, ճանապարհաշինարարության նոր ծրագրեր էլ կան՝ այդ թվում միջազգային բանկերի ֆինանսավորմամբ, սակայն ոչ մի նորմ չի պահպանվում»,- ասաց տիկին Ադամյանը՝ ավելացնելով, որ Հյուսիս – Հարավի ճանապարհի օրինակը ցայտուն է՝ նախատեսված էր, որ ճանապարհն ամբողջությամբ բետոնապատ պետք է լիներ, բայց մի կտորն է միայն այդպիսին։ «Մինչև մենք չհասկանանք, որ ամբողջ թերությունը մեր վատ աշխատանքի՝ կառավարության վատ աշխատանքից, սխալ կառուցապատման, պետական համակարգի վատ մասնագետների հետեւանքն է, որ այս ամեն ինչը մեկը մյուսի հետ կապված է, այս վիճակում ենք լինելու» , - ասաց բնապահպանը։

Աղբյուր` Փաստինֆո