Փաստ ինֆո

ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանի գլխավորած պատվիրակությունը Ֆրանսիայի Սևր քաղաքում մասնակցել է «Ֆրանսերենի խթանումը Հայաստանում» պիլոտային ծրագրի բացման միջոցառմանը: Այս մասին տեղեկանում ենք ՀՀ ԿԳՄՍ Նախարարության հասարակության հետ կապերի և տեղեկատվության վարչությունից։ 

Ծրագիրը միտված է ՀՀ հանրակրթական ուսումնական հաստատություններում ֆրանսերենի ուսուցիչների կարողությունների հզորացմանը՝ աջակցելով ոլորտի կրթական քաղաքականությանը՝ ի նպաստ ֆրանսերենի ուսուցման և բազմալեզվության, ինպես նաև ֆրանսերենի ուսուցիչներին վերապատրաստող խմբերի ձևավորման:

«Այցի շրջանակում ԿԳՄՍ նախարարի տեղակալ Արաքսիա Սվաջյանը Ֆրանսիայի Հանրապետության ազգային կրթության և երիտասարդության նախարարության Եվրոպայի և միջազգային հարաբերությունների և համագործակցության գծով տնօրեն Նատալի Նիկիտենկոնի հետ քննարկել է ֆրանսերենի ուսուցիչների վերապատրաստման ուղղությամբ համագործակցության մանրամասները:

Արաքսիա Սվաջյանը ներկայացրել է ՀՀ կրթության ոլորտի բարեփոխումները՝ շեշտադրելով նաև հանրակրթության նոր չափորոշչի ներդրումը: Այդ համատեքստում քննարկվել են նոր դասագրքերի ստեղծման գործընթացին, ուսուցիչների շարունակական մասնագիտական զարգացմանը, դպրոցների կառավարման համակարգին վերաբերող մի շարք հարցեր»,- ասվում է հաղորդագրության մեջ:

Ըստ աղբյուրի՝ ֆրանսիական կողմը ևս ներկայացրել է Ֆրանսիայի կրթական կառուցվածքը և այն հիմնական ստորաբաժանումների գործառույթները, որոնք ընդգրկված  են «Ֆրանսերենի խթանումը Հայաստանում» ծրագրում: Ֆրանսիացի գործընկերները նշել են, որ շուտով կկազմակերպվի ծրագրով ընտրված 30 ուսուցիչների այցը Ֆրանսիայի Հանրապետության Բորդո քաղաք, որտեղ կկայանա երկշաբաթյա վերապատրաստման հաջորդ փուլը:  

ՀՀ ԿԳՄՍ նախարարության տեղեկացմամբ՝ Ֆրանսիայում  հայկական  պատվիրակությունը հանդիպումներ է ունեցել նաև մի շարք կազմակերպությունների, այդ թվում՝ Փարիզի կրթության ազգային ինստիտուտի ղեկավարության հետ, քննարկել Հայաստանում գործող համանման կառույցների հետ հետագա համագործակցության  հնարավորությունները:   

Կողմերը կարևորել են Հայաստանի Հանրապետության և Ֆրանսիայի Հանրապետության միջև կրթության և մշակույթի ոլորտներում հարաբերությունների առավել ամրապնդումը:

Նշվում է, որ Արաքսիա Սվաջյանն այցելել է նաև AgroParisTech համալսարան։ Այցի ընթաքում քննարկվել են Հայաստանում Ֆրանսիական, Հայաստանի ազգային ագրարային և AgroParisTech համալսարանների միջև մի շարք ծրագրեր իրականացնելու հնարավորությունները:

Պայմանավորվածություն է ձեռք բերվել՝ այցի ընթացքում կատարված աշխատանքների ամփոփումից հետո կազմակերպել հեռավար հանդիպում՝ արդյունքները քննարկելու և հետագա փոխհամագործակցությունը նախանշելու նպատակով:

Աղբյուր` Փաստինֆո