Փաստ ինֆո

Սյունիքի մարզում իրականացվող «Հորիզոններ» դուալ կրթական ծրագրի առաջին ուս․ տարին ավարտվել է գործնական դասընթացով: Ինչպես «Արմենպրես»-ը տեղեկանում է «Իմ քայլը» բարեգործական հիմնադրամի տարածած հաղորդագրությունից, ՀԱԱՀ Սիսիանի մասնաճյուղի խելացի գյուղատնտեսության կենտրոնում այս անգամ  Սիսիանի ավագ, Գորիսի թիվ 1 և թիվ 4 ավագ դպրոցների աշակերտներն էին։

Գործնական վերջին դասընթացին հետևել է «Իմ քայլը» բարեգործական հիմնադրամի գործադիր տնօրեն Աննա Հակոբյանը։ Մինչև գործնական պարապմունքի մեկնարկը, ՀԱԱՀ Սիսիանի մասնաճյուղի տնօրենի պաշտոնակատարը շրջայց է կազմակերպել հյուրերի համար։ Գագիկ Խաչատրյանն Աննա Հակոբյանին է ներկայացրել խելացի գյուղատնտեսության կենտրոնի ինտենսիվ այգին, ջերմոցը, խելացի անասնագոմը, մեքենասարքավորումների ուսումնական և վերապատրաստման կայանը։ 

Հենց այդ վայրերում էլ Սիսիանի և Գորիսի 9 դպրոցների (Անգեղակոթի, Բռնակոթի, Շաղաթի, Շամբի, Լորի, Շաքիի, Սիսիանի ավագ, Գորիսի թիվ 1 և թիվ 4 ավագ դպրոցներ) աշակերտներն անցկացրել են իրենց գործնական պարապմունքները։

«Ծրագրի նպատակն է, որ աշակերտները ավագ դպրոցներում ձեռք բերեն ժամանակակից ու նորարար գյուղատնտեսական գիտելիքներ ու հմտություններ։ Դա կօգնի նրանց առաջիկայում մուտք գործել աշխատաշուկա։ Ծրագիրը թույլ է տալիս նաև հայտնաբերել աշակերտների հետաքրքրությունները, ինչն օգնում է նրանց մասնագիտական կողմնորոշման հարցում»,- ընդդծել է «Իմ քայլը» հիմնադրամի ծրագրերի և արտաքին կապերի գծով փոխտնօրեն Թալին Թօփալաքեանը։

Բարձր դասարանների աշակերտներին, որոնք կամավոր գրանցվել են «Հորիզոններ» ծրագրում, ամենից շատ հետաքրքրում ու գրավում է հենց գործնական պարապմունքը, որտեղ նրանց ներկայացվում է ժամանակակից գյուղատնտեսության գաղտնիքները՝ ինչպե՞ս է իրականացվում կաթիլային ոռոգումը ինտենսիվ այգում, ինչպե՞ս է կարկտապաշտպան ցանցը փրկում ամբողջ բերքը, ինչպե՞ս է պետք հողում սածիլ դնել կամ ինչպե՞ս մշակել հողը տրակտորով։ Ծրագրի մասնակիցներն անգամ բիզնես գաղափարներ են հասցրել մշակել։

«Գաղափարներս կենսաբանության ոլորտում էին։ Իրականացրել ենք մի նախագիծ, որով կանխում ենք բնության աղտոտումը։ Որպեսզի աշնանը գյուղացիները տերևները չայրեն ու չաղտոտեն օդը ջերմոցային ու ածխաթթու գազերով, մենք մեր նախագծի համաձայն չորացած տերևներից ստանում ենք էկոլոգիապես մաքուր օճառ և ջրափոշի»,- պատմել է Գորիսի թիվ 4 դպրոցի 11-րդ դասարանի աշակերտուհի Լիլի Արջունցը։

«Հորիզոններ»-ն արդեն դարձել է սիրելի և անփոխարինելի առարկա դպրոցականների համար, իսկ հաջորդ ուսումնական տարում ծրագրին միանալ ցանկացողների թիվն առաջին փուլից հետո էապես աճել է՝ նշել են կազմակերպիչները։

«Քանի որ ֆորմալ կրթությունը դասարանային է՝ փակ, իսկ բուն կրթական գործընթացը նաև պիտի լինի դասարանից դուրս, առավելությունը հենց դրանում է կայանում, հետևաբար երեխաների մոտ մասնակցության ցանկությունը օրեցօր աճում է։ Քանի որ բացի գործնական դասերից մենք խթանում ու մոտիվացնում ենք երեխաներին նաև այլ միջոցառումներով, այս տարի ևս ունենալու ենք արդեն սիրված ամառային ճամբարը, ինչն էլ ավելի է մոտիվացնում երեխաներին ու խթանում, որ մասնակցեն ծրագրին»,- մանրամասնել է «Իմ քայլը» հիմնադրամի «Հորիզոններ» դուալ կրթական ծրագրի ղեկավար Ռիմա Գրիգորյանը։

Աղբյուր` Փաստինֆո