Փաստ ինֆո

Հայ-ադրբեջանական հարաբերությունների կարգավորումը բոլորովին այլ կերպ կընթանար, եթե Հայաստանը չհրաժարվեր միջազգային փորձից։ Այսօր նման կարծիք է հայտնել ՀՀ երրորդ նախագահ Սերժ Սարգսյանը՝ անդրադառնալով հարցին, թե ինքն ինչպե՞ս կլուծեր այսօր հայ-ադրբեջանական հարցը:

«Դա շատ պարզ լուծվելիք խնդիր է»,- ասել է Ս. Սարգսյանը՝ ավելացնելով. «Կա միջազգային փորձ, կան միջազգային ատյաններ, եւ եթե Հայաստանը չհրաժարվեր այս երկու հանգամանքից, ապա բոլորովին այլ կերպ կլիներ: Չի կարող ԵԽ-ն կամ ԵՄ-ն իր նշած ստանդարտներից կամ ցած իջնել, կամ վեր բարձրանալ: Անմտություն է առանց միջնորդների վարել բանակցություններ: Բայց եթե մտել ենք այդտեղ, ես էլ ի՞նչ կարող եմ ասել»։

Ավելին՝ նա համոզված է, որ Տավուշում եւս սահմանազատման գործընթացներն այլ կերպ կընթանային։ «Նախ՝ կունենայինք հստակ դիրքորոշում, ինֆորմացիա, թե ինչի վրա են անում այդ սահմանազատումը: Մեկ ասում են՝ 1976 թվականի քարտեզ, հետո ասում են՝ չէ: Որեւէ մեկը տեսե՞լ է այդ քարտեզը: Եթե իրենց արարքի մեջ անընդունելի բան կա, իրենք ինչու չեն բաց անում այդ ամենը: Մենք նույնիսկ բանակցային գործընթացի մասին 90 տոկոսով ասում էինք, թե ինչ է, ոնց է, եթե դա չէր խանգարում բանակցությունների հետագա փուլերին: Հիմա ինչո՞ւ են գաղտագողի անում»,- նշել է նա:

Սերժ Սարգսյանը անդրադարձել է 1980-ականներին Վլադիմիր Մովսիսյանի նախագահությամբ տեղի ունեցած հայ- ադրբեջանական բանակցություններին՝ սահանազատման հարցերով։ Թեեւ դա չէր համարվում սահմանազատում, որովհետեւ դա գերագույն խորհուրդների մակարդակով չէր արվում. «Հայկական կողմից դա ղեկավարում էր Վլադիմիր Մովսիսյանը, եւ այդ փաստաթղթերը կան, թեեւ մեր պատգամավորների հարցումներին մեկ ասում են՝ չկա, մեկ ասում են՝ գաղգտնիության գրիֆն ավելի է խստացվել: Այդտեղ գաղտնիության ի՞նչ խնդիր կա: Ո՞ր պետական գաղտնիքը կարող էր բացահայտվել: Միայն մեկ գաղտնիք կա, որ շեղում կա այդ փաստաթղթերից, որը մեզ օգուտ չէ:

Այլ ի՞նչ գատղնիք կարող է լինել»,- ասել է նախագահն ու շեշտել, որ այսօր էլ ունենք օրենք, որ գաղտնիության մակարդակ սահմանում է այն մարմինը, որը պատասխանատու է այդ հանգամանքի համար:

«Հիմա ինչո՞ւ են գաղտնիության մակարդակը բարձրացրել: Թող իջեցնեն մակարդակը, այդ փաստաթղթերը հրապարակեն, մի հատ էլ ասեն՝ մեզնից ի՞նչ եք ուզում, տեսեք, այսպես է»,- նշել է Ս.Սարգսյանը:

Աղբյուր` Փաստինֆո