Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է ՀՀԿ փոխնախագահ Արմեն Աշոտյանի և մյուսների գործով դատական նիստը։

«Փաստինֆո»-ի հաղորդմամբ՝քննարկման առարկա է դարձվել հիմնական գործի նյութերը պաշտպանության կողմին տրամադրելու հարցը։ Մասնավորապես, Մարթա Սիմոնյանի պաշտպանը միջնորդեց ամբողջ ծավալով իրենց տրամադրել գործի նյութերը, ինչը գործով քննիչ Տիգրան Շոխոյանը չի արել՝ գործի 19 հատոր:

Պաշտպանության կողմը միացավ միջնորդությանը: Արմեն Աշոտյանի պաշտպանները նկատեցին՝ հնարավոր է, որ դրանց մեջ լինեն նյութեր, որոնք կարող են օգտակար նշանակություն ունենալ իրենց պաշտպանյալի ազատության համար:

Արմեն Աշոտյանը նույնպես ասաց՝ չգիտեն՝ այդ նյութերում ի՞նչ կա: Նա նշեց՝ գուցե դրանցում կան տվյալներ, որ այս գործը քաղաքական է:

«Դրանք հաստատում են իմ հայտնած այն տեսակետը, որ մեղադրանքն ինձ հետ կապ չունի, այն քաղաքական է։ Թող տան, տեսնեմ, որ այդքան հետազոտել են, տակը ի՞նչ կա, դրանք կամ պաշտպանական են, որոնք ինձ արդարացնող են, կամ քաղաքական են, ես ուզում եմ իմանալ, իրենք ինչ գիտեն իմ հանդիպումների մասին, դրանք իմ անձի վերաբերյալ տեղեկություններ են, ես ուզում եմ իմանալ՝ նրանք ինչ գիտեն իմ քաղաքական գործունեության մասին, էլ չեմ խոսում անձնականի մասին։ Օրենքով ինձ հետաքննել են, բարի եղեք, ինձ տրամադրել դրա արդյունքները»,- ասաց նա:

Հանրային մեղադրողն առարկեց միջնորդության դեմ։ Լսելով կողմերին՝ դատարանը որոշեց միջնորդությունը բավարարել մասնակի։ Դատական նիստի ավարտից հետո պաշտպան Ռուբեն Մելիքյանը լրագրողների հետ զրույցում համոզմունք հայտնեց, որ այդ գործի նյութերում՝ 10-ից ավելի հատոր, առկա են հօգուտ պաշտպանության կողմի նյութեր։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո