Փաստ ինֆո

Տարօրինակ բաներ եք ասում, մոտավորապես սա է՝ երեխան պետք է առողջ լինի, հա, պետք է լինի, հա, հիվանդանոցները պետք է վճարեն աշխատավարձերը, բայց կառավարությունն է չէ՞, ասել՝ ունեք բյուջեի չսահմանափակման իրավունք: Մատուցեք այն ծառայությունները, որի համար ունեք չսահմանափակման իրավունք այնքան, ինչքան կդիմեն: Հիմա ինչքան դիմել են, իրենք էդքան էլ մատուցել են: Այս մասին ԱԺ -ում 2023-ի բյուջեի կատարողականի քննարկման ժամանակ ասաց ՔՊ-ական պատգամավոր Արսեն Թորոսյանը՝ դիմելով առողջապահության նախարար Անահիտ Ավանեսյանին:

«Այսինքն չպետք է մատուցեի՞ն, պետք է գնային, մտնեին բյուջեի տողերի մեջ, զանգեին իրենց բոլոր ծանոթ հիվանդանոցներին, հասկանային՝ ինչքան է ծախսը բյուջետային էդ տողում, բաժանեին 4 մասի, որ եռամսյակային համամասնություն հասկանային, նոր հերթագրեի՞ն: Իհարկե ոչ: Դա, ի սկզբանե, պետք է պլանավորվեր, սա չպլանավորված միջոցառում է, ու առաջացել է այս վիճակը:

Հիմա մեղադրել հիվանդանոցներին, որ կուտակել են պարտքեր, կներեք, բայց արդար ու ազնիվ չէ: Կառավարությունն է կուտակել այդ պարտքերը, ոչ թե հիվանդանոցները:

Հիվանդանոցները մատուցել են այն ծառայությունները, որի իրավունքն ունեցել են»,-ասաց նա:

Անահիտ Ավանեսյանը պատասխանեց, որ եթե մենք ասում ենք, որ քաղաքացին սահմանափակված չէ, թե որտեղ ստանա բուժօգնությունը, այդ տրամաբանությամբ կարող ենք ընկալել, որ օրինակ, լիցենզիա չունեցող կազմակերպությունում էլ կարող է ստանալ, որովհետև իրեն այդպես հարմար է: «Բայց այդպես չի, չէ՞, մենք խոսում ենք ընդհանուր կարգավորումների, ընդհանուր տրամաբանության մասին:
Այո, երբ բժշկական կենտրոնի տարեկան պայմանագրի գումարը դուրս է գալիս, դա չի նշանակում, որ ընդհանուր ծրագրի տարեկան գումարը դուրս է եկել: Մենք երբեք նման կոմունիկացիա չենք իրականացրել»:

Նա նշեց, որ ԲԿ-ների հետ մենք կապի մեջ են, և ցանկացած տնտեսվարող պետության հետ առնչվելիս, ենթադրվում է, որ պետք է իմանա այն ընթացակարգերը, որով աշխատում է: «Այս տարի որևէ բան չի փոխվել: Չեմ հասկանում, թե ինչումն է խնդիրը։ Օֆերտան նոր չի ներդրվել: Օֆերտայով իրականացվող ծառայությունների գումարը 2023-ին եղել է մոտ 51 տոկոս: Մենք միայն ծավալներն ենք մեծացրել։ ԲԿ-ները տեղյակ են՝ ինչպես է աշխատում համակարգը»:

Աղբյուր` Փաստինֆո