Փաստ ինֆո

«Բլոկադայի մեջ ենք, ճանապարհ չկա, որ մի տեղի վրա դուրս գանք, մի բան վեր ունենք», - «Փաստինֆո»-ին ասաց Լոռու մարզի Այրում գյուղի բնակիչ Արմեն Ասլանյանը։ Նա 8 երեխաների հայր է՝ մեծը 13 տարեկան է, փոքրերը՝ 10 ամսական զույգեր են։

Բազմազավակ ընտանիքը հոր տեղեկացմամբ՝ զույգերի համար կաթնախառնուրդ էին ստանում Ալավերդու բժշկական կենտրոնից, սակայն այս օրերին, կամրջի փլուզման հետևանքով, բժշկական կենտրոն գնալու հնարավորություն չունեն։

Այրում գյուղը գտնվում է Ախթալա համայնքից վերև և, Դեբետ գետի վարարելու հետևանքով առաջացած աղետի պատճառով, ճանապարհը քանդվել է ու զրկվել են Ալավերդի և Երևան գնալու հնարավորությունից։

«Երեխաներն առողջ են, բայց չենք կարողանում գնալ կաթնախառնուրդն ստանալ, ոտքով գնում եմ Այրումի կայարան՝ Նոյեմբերյանի մոտ, որ ինչ-որ մի բան գնեմ, բերեմ երեխաների համար»,- ասաց Ա.Ասլանյանը՝ նշելով, որ կաթնախառնուրդ եւս գնում են, բայց շատ թանկ է, սկսել են ճաշիկներ շատ տալ, շիլաներ, իսկ կաթնախառնուրդից քիչ են տալիս, որ հերիքի։

Հարցին, թե արդյոք փրկարարների միջոցով հնարավոր չէ ստանալ փոքրիկների համար անհրաժեշտ կաթնախառնուրդը՝ բազմազավակ հայրը նշեց, որ ավելի ծանր վնասներ կրած հատվածներ կան, փրկարարները մենակ չեն հասցնում։ Ավելին, պարզվեց՝ ինքը եւս որպես կամավոր օգնում է փրկարարներին։ «Գնում, օգնում եմ, դե մեզ մոտ շատ բան չի եղել, շատ տեղեր կա, որ ջուրը տներն է լցվել , մերն ուղղակի ճանապարհ չունենալն է դեպի Ալավերդի։ Էլեկտրականություն ունենք»,- ասաց Այրումի բնակիչը՝ նշելով, որ գազ չունեն եւ 5 կիլոգրամանոց տարան ոտքով տարել է Այրում կայարան, լցրել ու տուն բերել, որ երեխաների համար ճաշ պատրաստի կինը։

«Բավական երկար ոտքի ճանապարհ է, բայց դե պետք է, գնում- գալիս եմ, ի՞նչ պետք է անենք ուրիշ»,- ասաց մեր զրուցակիցը։
Բնակավայրը մանկապարտեզ ունի, բայց այս օրերին չի աշխատում՝ ջրի ու սննդի բացակայության պատճառով։ «Ես ինքս բարձրանում եմ անտառի աղբյուրից եմ ջուր բերում տան համար»,- ասաց բազմազավակ ընտանիքի հայրը։

«Փաստինֆո»-ի հարցին, թե քանդված կամրջի տեղում կատարվո՞ւմ են արդյոք շինարարական աշխատանքներ, ժամանակավոր լուծումներ տրվո՞ւմ են՝ ճանապարհը վերականգնելու համար, մինչեւ հիմնական կամրջի վերանորոգումը կամ կառուցումը՝ Ասլանյանն ասաց, որ դեռ գետն այդ հատվածում բարձր է, ինչ էլ լցնեն կտանի։

Ինչ վերաբերում է պետական աջակցությանը, ապա բլոկադայի մեջ հայտնված բազմազավակ ընտանիքի հայրն ասաց, որ միայն երեկ համայնքապետարանից սկսել են վնասներն ու կարիքները գույքագրել, հետաքրքրվել, ցուցակագրել, որ տեսնեն ում՝ ինչով կկարողանան օգնել ու փոխհատուցել։

«Իմ ընտանիքն էլ վնասներ ունի, բերքն է վնասվել», ասաց Ասլանյանը։

Աղբյուր` Փաստինֆո