Փաստ ինֆո

Գետերի վարարման հետեւանքով առաջացած վարարումների պատճառով տուժել են նաև Լոռու մարզի տնտեսվարողները։

Բազմաթիվ փոքր և մեծ խանութներ, սննդի կետեր այս օրերին դժվարանում են սկսել աշխատանքը։ Ավելին՝ Խանութների մի մասը կորցրել է ապրանքը, վնասվել է տեխնիկան։

Ալավերդու սուպերմարկետներից մեկի աշխատակիցները մարզային հեռուստաընկերությանը պատմել են, որ տիղմից մաքրել են հատակը, բայց ջուրը հասել էր պահարանների ներքևի դարակներին, վնասել ապրանքը։ Պատճառված նյութական վնասի մասին գնահատականների համար դեռ վաղ է, նախ՝ պետք է խանութն ամբողջությամբ մաքրվի տիղմից, հասկանան, թե որքան տեխնիկա ու ապրանք է փչացել։

Չի աշխատում նաև Ախթալայի լեռնահարստացման կոմբինատը։ Այս գործարանն ունի հումքի հարց, որը առաջիկա օրերին չի լուծվի, Ախթալա համայնքը մնացել է առանց արտաքին աշխարհի հետ կապող կամրջի, երկաթգծի, ինչի հետեւանքով չեն իրականացվում բեռնափոխադրումներ։

Մարզի համայնքներում գրանցում են աղետից տուժած ընտանիքների կարիքները, ով ինչ վնաս է կրել, այս պահին ինչ օգնության կարիք ունի։ Այրումի բնակիչներից մեկը «Փաստինֆո»-ին պատմեց, որ գրանցում են աշխատանք չունեցողներին, իսկ այն անձիք, ովքեր համարվում են աղետի հետեւանքով հարկադիր պարապուրդի մեջ են հայտնվել, դեռևս անորոշության մեջ են ու չգիտեն, թե ինչպես են իրենց կեցությունը հոգալու։ Անգամ չեն պատկերացնում, թե ինչպես են աշխատավարձ, թոշակ ու նպաստ ստանալու՝ աշխատավայրից, բանկից, թե փոստից։ «Ասենք թոշակ կամ օգնության գումար տան, ի՞նչ ենք անելու, այդ գումարը ո՞նց ենք կանխիկացնելու, Այրումում բանկոմատ չկա»,- իր մտահոգությունը հայտնեց բնակիչ։

Աղբյուր` Փաստինֆո