Փաստ ինֆո

Դատավոր Դավիթ Գրիգորյանի գործով դատաքննությունը վերսկսվել է, թեև գործն արդեն ավարտական փուլում էր և նախատեսվում էր ճառերի հրապարակումը։ Հակակոռուպցիոն դատարանը՝ դատավոր Սարգիս Դադոյանի նախագահությամբ, որոշել է սեփական նախաձեռնությամբ լրացուցիչ վկաներ հրավիրել դատարան՝ հարցաքննության։ Այս մասին «Փաստինֆո»-ն տեղեկանում է փաստաբան Գեորգի Մելիքյանից։ Վերջինս դատարանի այս գործողություններում ձգձգման միտում է տեսնում։

Հիշեցնենք, որ դատավոր Դավիթ Գրիգորյանն այն դատավորն է, որը 2019թ մայիսի 18-ին ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը, իսկ մայիսի 20-ին որոշում կայացրել քրեական գործի վարույթը կասեցնելու եւ ՍԴ դիմելու մասին, ինչի դեմ դատախազները բողոք էին ներկայացրել։ Դատավոր Գրիգորյանի որոշումներին հաջորդեց գործադիր իշխանության կողմից աննախադեպ ճնշումը դատարանների նկատմամբ եւ վարչապետ Նիկոլ Փաշինյանի նախաձեռնությամբ շրջափակվեցին դատարանների մուտքերն ու ելքերը, դատավորի նկատմամբ սկսվեց քրեական հետապնդման իրականացումը, որը թե՛ Առաջին ատյանի դատարանի, թե՛ Վերաքննիչ քրեական դատարանի կողմից ապօրինի է արձանագրվել, գործը՝ կարճվել։ Վճռաբեկ դատարանը, սակայն, բեկանել է որոշումները և գործն ուղարկել առաջին ատյանի դատարան՝ նոր քննության։ Այժմ գործը Հակակոռուպցիոն դատարանի դատավոր Սարգիս Դադոյանի վարույթում է։

Դավիթ Գրիգորյանին մեղադրանք է առաջադրվել ՀՀ նախկին քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ 

Դատավոր Դավիթ Գրիգորյանի լիազորությունները ժամանակավորապես կասեցված են եղել, օրենսդրական փոփոխություններից հետո դատավորը ներառվել է ռեզերվում։ Նույն գործով մեղադրյալի կարգավիճակում է նաև Գոռ Վարդանյանը, որը մեղադրվում է իբրև օժանդակության մեջ։

Հեղինակ՝ Իզաբել Սահակյան

Աղբյուր` Փաստինֆո