Փաստ ինֆո

Հայաստանն ուզում է ուժեղանալ, ամրապնդել իր սահմանները, հզոր պետություն դառնալ, Հայաստանի քաղաքացիները, պատգամավորները, կուսակցությունները խանգարում են դրան, չգիտեմ՝ միտումնավոր, թե չհասկանալով: Այս մասին Ազգային ժողովում նիստի ժամանակ ասաց ՔՊ-ական պատգամավոր Խաչատուր Սուքիասյանը։

«Մեր ունեցած տեղեկությունները հաշվի առնելով՝ մեր մոտ կարծիք է ստացվում, որ մեր գործընկերները և ՀՀ շատ քաղաքացիներ ծառայում են այլ պետությունների: Մի մասն ուղղակի ծառայում է պայմանագրային հարաբերությունների արդյունքում, մի մասը չգիակցելով՝ իր ընկերներին լսելով։
Տարիներ հետ գնանք ու տեսնենք, թե մեր երկիրը ովքեր են ղեկավարել, կառավարել, տեսնենք, թե ինչ ձևով էին վերաբերվում այն մարդկանց, ովքեր մի օտար երկրի անուն էին տալիս կամ մի օտար երկրի հետ հարաբերություն էին ունենում, շատ վատ էին վարվում՝ կա՛մ այդ մարդիկ բանտում էին հայտնվում, կա՛մ այդ մարդիկ մահանում էին, կա՛մ՝ ունեզրկվում։ Եթե դուք ձեր չափը չճանաչեք եւ խանգարեք ՀՀ զարգացմանը, ձեզ հետ նույն գործիքներով կխոսենք: Դուք պետք է ձեր չափը լավ ճանաչեք։ Այն գործիքները, որը դուք 20 տարի կիրառել եք, կկիրառվի ձեր դեմ:
Ես որպես Հայաստանի քաղաքացի, որն ունի ընտանիք, զավակներ, թոռներ, ամեն ինչ անելու եմ, որ Հայաստանը լինի հզոր, ուժեղ: Իսկ մնացած հորինվածքները, որոնք հորինում եք՝ սահմանները տվին, հողերը տվին՝ դրանք նրա համար են, որպեսզի շատ լավ կարողանաք հասարակությանը գցել մոլորության մեջ»,- ասաց Խաչատուր Սուքիասյանը։
Նա նաև նշեց, որ ընդդիմադիրները «ամենավատ վնասը տվել են Ղարաբաղի քույրերին, եղբարներին, երբ նրանց հրավիրել են միտինգին»։

«Նրանք Հայաստանի այն քաղաքացիների, գործարարների ջանքերի ու հարկերի շնորհիվ են կարողանում համապատասխան նպաստը ստանալ, բնակարանները, տները, որոնք ապագայում կունենան, մինչև այսօր, որոնք ֆինանսական ոչ մի խնդիր չունեն։ Շատ մեծ վատություն եք անում»,- ասաց Սուքիասյանը։

Նա նաև ասաց, որ տեղեկություն ունի, որ 44-օրյա պատերազմի ժամանակ միտումնավոր մարդկանց տեղերը տվել են, որպեսզի մեր զինվորներին սպանեն։ «Ինչո՞ւ։ Որպեսզի այդ ժամանակվա իշխանությունը պարտվի, որպեսզի կարողանան որոշ քաղաքական ուժեր, մարդիկ...»,-ասաց նա, Սուքիասյանին տեղից հակադարձեցին՝ ինչին ի պատասխան նա խնդեց, որ ինքն այնտեղ է եղել։ «Դուք էլ գիտեք, որ սեպտեմբերի 29-ին եղել եմ այնտեղ, Ղարաբաղի նախագահի համապատասխան բունկեր էր կոչվում, այնտեղ եղած ժամանակ տեսել եմ Սամվել Բաբայանին, որ այդ մտքերն ասել է այդ ժամանակվա գործող Ղարաբաղի նախագահին։ Ես ոչ մի բան ինձանից չեմ հորինում»։

Ընդդիմադիր պատգամավորները տեղից սկսեցին հակադարձել ՔՊ-ականին, նիստը նախագահող ԱԺ փոխնախագահ Հակոբ Արշակյանը պահանջեց լռություն պահպանել դահլիճում։

Աղբյուր` Փաստինֆո