Փաստ ինֆո

Այս տառապանքը պետք է պատասխան գտնել, չի կարող անպատասխան մնալ։ Մեր՝ այստեղից Երևան հասնելը հենց այդ նպատակն ունի։ Սա պետք է վերջ գտնի։ Այս մասին Կիրանցի բնակիչների հետ հանդիպման ժամանակ ասաց Տավուշի թեմի առաջնորդ Բագրատ արքեպիսկոպոս Գալստանյանը։

Կիրանցի բնակիչներից մեկն էլ ավելացրեց՝ գյուղում այս պահին սուգ է, իրենք սգում են, տանջվում, սյունն իր հորական հողում են տնկել, վաղն էլ՝ հանելու են իրենց տանից։

«Խնդրում եմ՝ թիկունքիս կանգնել, ես իմ տանից դուրս չեմ գնալու, ոչ մեկից չեմ վախենում»,- ասաց բնակչուհիներից մեկը։
Բագրատ Սրբազանն էլ արձագանքեց՝ բաժանում է մտցվել բնակչության շրջանում։ Գյուղացիներից մեկն էլ խնդրեց բնակչությանը՝ լինել Սրբազանի կողքին, ասում է՝ եթե նա չլինի՝ կորած են։

Լրագրողի հարցին՝ ինչպես կարողացան մուտք գործել Կիրանց, շրջանցել ոստիկաններին, ԱԺ պատգամավոր Արթուր Սարգսյանն էլ արձագանքեց՝ «Սրբազանը հիմա գյուղում է, Վահե Ղազարյանը թող մտածի, որ այլևս համակարգը չի գործում։ Թե ոնց է եկել՝ կարևոր չէ, կարևորը, որ Սրբազանն այստեղ է»։ Բագրատ Սրբազանն էլ հեգնեց՝ օդապարիկ ունի հատուկ, հրեշտակի թևերով է եկել, թող գնան հրեշտակներին ձերբակալեն։

Կիրանց գյուղ է եկել նաև Տավուշի մարզային վարչության պետ Արթուր Մկրտչյանն էլ դժգոհությամբ էր հետևում։ Բագրատ Սրբազանն ընգդծեց՝ այս հայրենիքում ոչ ոք իրեն չի կարող կասեցնել, սա իր տունն է, իր հայրենիքը, իր պետությունը։

Բնակիչներից հետ զրուցելուց և եկեղեցում աղոթքից հետո Բագրատ Սրբազանը և ԱԺ պատգամավոր Արթուր Սարգսյանը ոստիկանների ուղեկցությամբ շարժվեցին դեպի գյուղից դուրս։

Աղբյուր` Փաստինֆո