Փաստ ինֆո

ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը այսօր հրապարակել է ԱԺ նախագահ Ալեն Սիմոնյանի՝ հակառուսական հայտարարությունների վերաբերյալ ՌԴ պետդումայից ստացված գրության պատասխանի բովանդակությունը։

Նա, մասնավորապես, նշել է, որ նամակն ստացել է ինքը՝ Դաշնային Խորհրդի Միջազգային կապերի հանձնաժողովի նախագահից։
Ռուսական կողմը հետաքրքրվել է, թե արդյո՞ք ՀՀ ԱԺ նախագահի ելույթում հնչեցված թեզերը կիսում է ՀՀ ԱԺ-ն ու արդյոք այն արտահայտում է ՀՀ իշխող ուժի տեսակետը։

«Ես անտրամաբանական եմ համարել այդ հարցին պատասխանելը, որովհետև, բնականաբար, ԱԺ նախագահը, երբ ներկայացնում է ՀՀ ԱԺ-ն, ներկայացնում է նաև բովանդակությունը, հետեւաբար՝ բնականաբար այդ հարցի պատասխանն է ՝ այո, որ այն ինչ հնչեցրել է , ներկայացնում է ՀՀ ԱԺ-ի քաղաքական մեծամասնության դիրքորոշումը։ Պատասխան նամակում նշել եմ այն սկզբունքները, որոնցով մենք առաջնորդվում ենք՝ ՀՀ շահերը՝ տարածքային ամբողջականությունը և ինքնիշխանությունը պաշտպանելու տեսանկյունից ու նաև մտահոգություն հայտնել ՌԴ Դաշնային

Խորհրդի և Պետական Դումայի մի շարք պատգամավորների կողմից հնչեցվող խոսույթի վերաբերյալ, որոնք չեն բխում Հայաստանի և Ռուսասատանի ժողովուրդների շահերից, որոնք դարավոր բարեկամական կապեր ունեն»,- այսօր լրագրողների հետ զրույցում ասել է Սարգիս Խանդանյանը։

Անդրադառնալով ռուս սահմանապահների՝ Թուրքիայի սահմանին տեղակայված մնալու հարցով ՌԴ-ին ուղղված խնդրանքի վերաբերյալ հարցին՝ Խանդանյանը նշել է, որ այդ հարցը կարգավորված է պայմանագրով։

«Թուրքիայի հետ սահմանին ՌԴ սահմանապահ ուժերի գործունեությունը կարգավորվում է պայմանագրով և տրամաբանական չէ, որ Հայաստանը խնդրի մի բան, որը պայմանագրով կարգավորված է։ Ինչ վերաբերում է մնացած հատվածներին, ապա Հայաստանը առաջարկել է, որ այն հատվածներին, որոնք եղել են բանավոր պայմանավորվածությունների շրջանակում, ապա Հայաստանը խնդրել է, որ դուրս գան՝ գտնելով, որ այլևս դրա կարիքը չկա»,- ասել է Ս. Խանդանյանը՝ նշելով, որ իր տեղեկություններով ՌԴ համապատասխան մարմինների ծառայողներն այդ հատվածներից արդեն սկսել են դուրս գալ

Աղբյուր` Փաստինֆո