Փաստ ինֆո

«Իմ գյուղը ինչ կորոշի՝ իր հետ կլինեմ, ես արդեն չգիտեմ այպիսի իշխանություն ունենալուց հետո, էլ ինչ պետք է անենք»,- «Փաստինֆո»-ի հետ զրույցում ասել է Կիրանցի բնակիչ Անդրանիկ Նազարյանը՝ նշելով, որ վարչապետի հետ հանդիպումներին մասնակցելուց հետո, տեսնելով նրա՝ բնակիչների հետ խոսելու ոճը, այլեւս անիմաստ է համարում ցանկացած իշխանավորի հետ հանդիպմանը մասնակցելը։

Նրա փոխանցմամբ՝ առավոտյան Կիրանցի ճանապարհը երկակի փակ է եղել. Նախ ժողովուրդն էր փակել Հայաստան-Վրաստան միջպետական ճանապարհի Կիրանցի հատվածը, ապա նաեւ ոստիկանները՝ տեղադրելով անցակետ, որով Կիրանց թողնում էին գնալ միայն Կիրանցի բնակիչներին։ Մարզպետի հետ անարդյունավետ հանդիպումից հետո կիրանցեցիները անիմաստ են համարել ճանապարհի փակ պահելը եւ բնակիչները բացել են։

«Ես արդեն մտածում եմ, որ ավելի վատ էլ կարող է լինել, իրենք նշում են, որ այդ երեք կետերի միջև դեռ քննարկում է գնում՝ եռանկյունու մասով ու ինչ- որ փոխհատուցման մասին են խոսում։Դեռ չեն էլ նշում, թե քանի հոգու, եթե իրենք հստակ սահման իմանային՝ կասեին ում՝ ոնց, բայց անորոշ խոսացել, գնացել են»,- ասաց մեր զրուցակիցը։

Բացի այդ, պարզվում է մարզպետի հետ հանդիպմանն ասվել է, որ,իբր, կիրանցեցիներն այնքան են բողոքել, որ իրենց «հայրիկ» Ալիևը ջղայնացել է ու ոչ մի զիջման չի գնում։ Այս մասին մեր զրուցակիցը նշեց՝ վկայակոչելով հանդիպմանը մասնակցած գյուղացիների խոսքերը՝ ավելացնելով. «Հիմա կիրանցեցիներին են դարձնում մեղավոր»։

«Դա ղեկավարի հայտարարությո՞ւն է։ Ես չգիտեմ ինչ են ուզել դրանով ասեն, մենակ խեղկատակը կամ էս պետության թշնամին կարող է նման բան ասել իր ժողովրդին։ Հիմա հասկանո՞ւմ եք, թե ինչի չենք ուզում էլ հետները հանդիպել։Դրանց ամեն ինչը փուչ ու սուտ ա, խաբեբաներ են, էլի»,- եզրահանգեց Կիրանցի բնակիչը։

Աղբյուր` Փաստինֆո