Փաստ ինֆո

Մենք կարծում ենք, որ սահմանազատման գործընթացը հաջող է անցել, ՀՀ տարածքից որևէ միլիմետր հող չի զիջվել: Այս մասին հանրային հեռուստաընկերության եթերում հայտարարել է ՀՀ ԱԽ քարտուղար Արմեն Գրիգորյանը:

Նա ընդգծեց, որ շատ կարևոր համաձայնություն է ձեռք բերվել Ալմա Աթայի հռչակագրի հիման վրա որպես սկբունք սահմանազատման գործընթաց սկսել, պայմանավորվածություն է ձեռք բերվել, որ օգտագործվելու են խորհրդային միության վերջին տարիներին գոյություն ունեցող իրավական քարտեզները։ «Դա է պատճառը նաև, որ 1976 թվականի քարտեզն է սահմանազատման հիմք վերցվել և ըստ դրա՝ մենք սահմանազատում ենք անցկացրել: Այդ սահմանազատման գործընթացի ընթացքում գծվել է սահմանը, սահմանից այս կողմ ՀՀ տարածքն է, սահմանից այն կողմ՝ Ադրբեջանի տարածքը»,-ասաց նա:

Նա հայտնեց, որ Ոսկեպարի եկեղեցին մնացել է Հայաստանի տարածքում, սահմանի գիծը բավականին հեռու է անցնում:
«Տարածքների մասով, բնականաբար մինչև այս պահը այդ տարածքներում զինված ուժերն էին ծառայություն իրականացնում և այդ ծառայության իրականացման պատճառով որտեղ դիրքեր կային, այդ դիրքերում համայնքները իրենց հողերին հասանելիություն չեն ունեցել: Հիմա, երբ այդ դիրքերից զինված ուժերը դուրս են գալիս և սահմանապահներն են տեղադրվում, այդ տարածքները ազատվում են և անցնում են գյուղացիների ամենօրյա աշխատանքներ կատարելու վերահսկողության տակ»։

Նա նաև ընդգծեց, որ սահմանազատման գործընթացը մյուս տարածքներում ևս կիրականացվի 1976 թվականի քարտեզներով:

Նա նշեց, որ միանգամից ամբողջ սահմանի երկայնքով սահմանազատում անելը հնարավոր չէ։ «Մեր վերջին 30 տարվա փորձը ցույց է տալիս, որ երբ մենք փորձում ենք ամեն ինչ մեկ փաթեթով լուծել դա դժվարանում է, երբ քայլ առ քայլ ենք գնում՝ հնարավոր է դառնում։ Սյունիքի մարզում մենք նման փորձ ունենք, երբ 2 կողմից սահմանապահներն են կանգնած և այդ հատվածներում հիմնականում խաղաղ է»։

Նա ընդգծեց, որ Հայասռտանի սահմանազատման համար նախադեպ է ստեղծվել։

Հարցին, թե որտեղից երաշխիք, որ գործընթացը կշարունակվի ու Ադրբեջանը մեզ կտա այն ինչ մեզ է պատկանում՝ Գրիգորյանն ասաց, որ վստահություն տալիս են քարտեզները։ «Մենք գիտենք, որտեղ է Հայաստանը և գիտենք, որտեղ է Ադրբեջանը։ Հայաստանի և Ադրբեջանի սահմանն ամբողջությամբ գոյություն ունի։ Ըստ դրա՝ ինչ պատկանում է Հայաստանին՝ անցնելու է Հայաստանին, դա միանշանակ է»։

Աղբյուր` Փաստինֆո