Փաստ ինֆո

Դրական, խորհրդանշական և նույնիսկ օրինաչափ է, որ շարժումն առաջնորդում է հոգևորականը։ Ի վերջո՝ Բագրատ Սրբազանը և եկեղեցին կարողանում են առանց մեր քաղաքական նախընտրությունների, կարծիքի՝ բոլորին համախմբել մեկ նպատակի շուրջ։ Եկեղեցին բոլորի համար է և դու ընդունված ես եկեղեցում, ինչը շատ անհանգստացնող է մեր իրավունքը խախտող դավաճանների համար, որովհետև իրենց բուն նպատակն իրագործելու համար իրենց պետք է պառակտել մեզ։ Այս մասին «Փաստինֆո»-ի հետ զրույցում ասաց վավերագրող Հովհաննես Իշխանյանը։

«Անհանգստությունը կարող է շատ լինել իրենց մոտ, դրա համար էլ՝ կարող են փորձել նոր մեթոդներով պառակտել։ Միայն երկու զենք ունեն՝ գռեհկաբանությունը, զազրախոսությունը և ոստիկանությունը։ Համախմբումը ստացվում է։ Միայն չեն համախմբվում պաթոլոգիկ հակաեկեղեցականները։ Այն, որ սրանք եկան և Արցախի հանձնումը չէր կարող լինել առանց մեզ պառակտելու, հիմա էլ՝ նույնը։ Այս պայմաններում մենք պետք է փայփայենք մեր համախմբումը և զորացնենք նրան, ով կարողանում է համախմբել»,- ասաց Իշխանյանը՝ հավելելով, որ շատ կարևոր է Բագրատ Սրբազանի ներկայությունը, քանի որ կա հեղինակություն, ում բոլորն ընդունում են, քաղաքական ուժերը չեն մրցակցում, եկեղեցին կարող է ստեղծել այն դաշտը, որ քաղաքական գործիչները հետագայում մտնեն արդար մրցակցության մեջ։

Իշխանյանը շարժումը պառակտելու փորձեր արդեն տեսնում է։ Հարցին՝ արդյո՞ք ընդդիմադիր պատգամավորների շրջանում ևս տեսնում է՝ Իշխանյանը պատասխանեց՝ նշելով․ «Տարօրինակություններ տեսնում եմ, բայց քանի որ բոլոր ճաքերը պետք է մաքրազերծել և վերադարձնել բուն նպատակին, այդ տարօրինակությունների մասին շատ վերլուծություններ չեմ ցանկանում ասել։ Միայն կոչ կանեմ թե՛ լրագրողներին, թե՛ քաղաքացիներին, թե՛ ԱԺ պատգամավորներին՝ փորձել հարթել կոնֆլիկտներն այնպես, որ մեր նպատակները դրանից չտուժեն, իսկ ես կարծում եմ, որ մենք բավականին իմաստուն, հեռատես ու խելամիտ ենք, որ կարողանանք նեղանձնային կոնֆլիկտները, նեղացկոտությունները չվերածել այնպիսի բանի, որը ձեռնտու կլինի մեր սահմանադրական իրավունքները խախտողներին։ Մեր բոլորի սահմանադրական իրավունքներն են խախտվել և մեր կռիվն այդտեղ է»։

Հիշեցնենք, որ այսօր Կիրանցում միջադեպ է եղել ԱԺ «Հայաստան» խմբակցության պատգամավոր Գեղամ Նազարյանի մասնակցությամբ։ Վերջինս բղավել և վիրավորել է լրագրող Անի Գևորգյանին, որն արդեն շուրջ երկու ամիս է՝ ապահովում է հանրային իրազեկումը՝ Կիրանցում տեղի ունեցող ապօրինությունների վերաբերյալ։ «Հայաստան» խմբակցության պատգամավորները հայտարարել են, որ Գեղամ Նազարյանի հնչեցրած հուզական արտահայտությունները չեն հանդիսանում «Հայաստան» խմբակցության դիրքորոշումը և չեն արտահայտում խմբակցության պատգամավորների տեսակետը:

Հեղինակ՝ Իզաբել Սահակյան

Աղբյուր` Փաստինֆո