Փաստ ինֆո

Էդ փոխհատուցումը մեզ պետք չէ, ձեզ պահեք։ Մենք մեր ապրելն ենք ուզում մեր գյուղում, - ասել են գյուղապետարանում հավաքված բնակիչները։

Ինչպես արդեն հայտնել ենք՝ այսօր առավոտից Կիրանցում լարված է, բնակիչների մի մասը նախ հավաքվել էր գյուղամեջ՝ քննարկելու ստեղծված վիճակը, որոշներն էլ հետո գնացել են գյուղապետարան։

Ավելին՝ դպրոցից դուրս են բերել իրենց երեխաներին՝ համարելով, որ նրանց կյանքին վտանգ է սպառնում։

Գյուղապետը վստահեցրել է, որ ժողովրդի հետ է ու հենց գյուղացիներին հարցրել՝ հրաժարական տա, թե ոչ։

«Ես ժողովրդի հետ եմ, լսեցիք՝ մարդ է գալիս Իջևան, ասել են ակտիվներից թող մարդիկ գան Իջևան, որտեղ միասին քննակենք, հասկանանանք, թե ինչ է կատարվում։ Ես ոչ մեկի շահը պահողը չեմ, ես ձեր կողքին եմ, կուզ՞եք հրաժարական կտամ», - ասաց գյուղապետ Կամո Շահինյանը։
Ի պատասխան բնակիչները նշեցին, որ պետք է ոչ թե իրենք Իջևան գնան՝ քննարկման , այլ իրենց մոտ պետք է գան։ Բնակիչների արձանագրմամբ՝ ամբողջը խաղ է եղել, իրենց խաբելով սպասեցրել են։

«Վարչապետի ասած ոչ մի բանը չի կատարվում, մարդիկ ունեն սեփականության վկայականը, էդ փոխհատուցումը պահեք ձեզ համար, մեզ պետք չի, մենք մեր ապրելն ենք ուզում մեր գյուղում, մենք մեր հողն ենք ուզում։ Ոչ մի սահմանազատում չկա, սահմանազատումը, ո՞նց ա լինում՝ սկզբից խաղաղություն են կնքում, հետո նոր սահմանազատում են անում։ Հետն էլ մեկը մեկի գերիներին վերադարձնում է։Հիմա դրա մասին էլ խոսք չկա»,- ասաց Կիրանցի բնակիչը։

Աղբյուր` Փաստինֆո