Փաստ ինֆո

Գիշերը՝ մթության քողի տակ տեղի է ունեցել այս տխրահռչակ սահմանազատման և սահմանագծման հանձնաժողովների հերթական նիստը, որի արդյունքում արձանագրում ենք, որ այս իշխանությունը չի շեղվել իր հանցավոր ճանապարհից, ինչի մասին է վկայում արձանագրության նկարագրության համաձայնությունը, մամուլի հաղորդագրությունները, կառավարության ղեկավարի աշխատակազմի կողմից տրված պարզաբանումները: Այն տեղի է ունենում՝ ի հաշիվ մեր պետության, մեր ժողովրդի, մեր կյանքի և մեր քաղաքացու, ընդհանրապես մեր գոյության: Այս մասին հայտարարել է Տավուշի թեմի առաջնորդ Բագրատ Սրբազանը՝ իր ուղերձում։

«Իշխանությունների վրա ազդեցություն չունեցան այն լայն հիմնավորումները, իրավական, օրենսդրական դաշտում, որոնք տրվել են բազմաթիվ մասնագետների կողմից, արձանագրված փաստերը, բարոյական հիմքերը և միաժամանակ այն լայն անհամաձայնությունը, որ հայտնել են քաղաքացիները: Դա ևս մեկ անգամ փաստում է, որ նրան գործում են Սահմանադրության, օրենքների, իրավունքի, ինքնության, բարոյականության, տրամաբանության բոլոր տեսակի չափանիշներին հակառակ: Այդ իմաստով անհրաժեշտություն է դարձել գնալ ոչ թե հետևանքների հետևից, այլ ուղղակիորեն վերացնելու պատճառները: Պատճառը մեկն է և այն Երևանում է, եւ այլևս հրատապություն ու հրամայական է դարձել ժամ առաջ բոլորիս ջանքերով, համառ կամքով, համբերությամբ և վստահությամբ հեռացնելու այս իշխանությունը իր ամբողջ ապօրինություններով հանդերձ և նոր կյանք հաստատելու մեր երկրում: Սա արյունաքամության ամբողջական մի շղթա է, որը պետք է կանգ առնի: Մենք մեր անհամաձայնությամբ, առաջիկա գործողություններով, որոնց մասին որոշակիորեն, կոնկրետ կերպով կներկայացնենք ձեզ, պետք է ընթանանք այս ճանապարհով, որովհետև այլ ելք, նախընտրություն մեզ համար չկա»,- հայտարարեց Բագրատ Սրբազանը:

Աղբյուր` Փաստինֆո