Փաստ ինֆո

«Տավուշը հանուն հայրենիքի» շարժման ակտիվ մասնակիցներ, «Ազատազէն» կազմակերպության խորհրդի անդամ Իշխան Գևորգյանը, կազմակերպության անդամներ Հրաչյա Թովմասյանը, Հարրի Ավագյանը, Անդրանիկ Եղոյանը, Հայկ Մեսրոպյանը ձերբակալվել են՝ իբրև ապօրինի զենք պահելու կասկածանքով, ինչը հերքվել է անձնական խուզարկությամբ։ Փաստաբան Վարազդատ Հարությունյանը «Փաստինֆո»-ի հետ զրույցում ասաց, որ ձերբակալման որոշումն ընդհանրական ձևակերպումներով է, պարզապես ձերբակալել են։ Նրա գնահատմամբ՝ ձերբակալությունը, ի սկզբանե, ապօրինի է։

«Ակնհայտ է, որ նպատակը քաղաքական է, 72 ժամով ձերբակալված պահելով՝ քաղաքացիական ակցիաներից հեռու պահելը»,- նշեց Վարազդատ Հարությունյանը՝ հավելելով, որ խուզարկությամբ ոչինչ չի հայտնաբերվել, բայց ձերբակալել են։

Հիշեցնենք, որ «Ազատազէն» կազմակերպության խորհրդի անդամ Իշխան Գևորգյանը, կազմակերպության անդամներ Հրաչյա Թովմասյանը, Հարրի Ավագյանը, Անդրանիկ Եղոյանը, Հայկ Մեսրոպյանը ձերբակալվել են մայիսի 14-ի լույս 15-ի գիշերը՝ ապօրինի հրազեն, պայթուցիկ նյութեր, պայթեցման սարքերի ձեռք բերման և տեղափոխման կասկածանքով:

Ձերբակալությանն անդրադարձել է նաև «Ազատազէն»-ը՝ նշելով, որ ԿՀԿ-ն ձեռնարկելու է բոլոր օրինական միջոցները Իշխան Գևորգյանի և մյուս ընկերների իրավունքները պաշտպանելու համար։

«Մենք՝ հատկապես Իշխանը, մարդիկ ենք, ովքեր օր ու գիշեր զբաղվում ենք օրինական զենքի մշակույթի տարածմամբ, մեր ամբողջ ջանքը դնում ենք դրան համապատասխան ենթակառուցվածքների ստեղծմանը, օրենքները կարգավորելուն և դրա մասին բոլորը գիտեն։ Մեր խոստումն է ինքներս մեզ, որ մեր գիտելիքով և զենքերով ներքին հարցեր չենք լուծելու: Այդ խոստումը միշտ պահել ենք և պահում ենք», - նշում է Ազատազէն ԿՀԿ գործադիր տնօրեն Նաղաշ Բաղդասարյանը:

Հեղինակ՝ Իզաբել Սահակյան

Աղբյուր` Փաստինֆո