Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է ՀՀԿ փոխնախագահ Արմեն Աշոտյանի և մյուսների գործով դատական նիստը։

«Փաստինֆո»-ի թղթակցի հաղորդմամբ՝ դատական նիստին չի ներկայացել մեղադրյալներից Մարթա Սիմոնյանը, քանի որ օրերս փոքրիկ է ունեցել և առաջիկա 20 օրերին պետք է գտնվի երեխայի հետ։

Մինչ մեղադրյալի բացակայության հիմքով կհետաձգվեր դատական նիստը, հայտարարության համդես եկավ Արմեն Աշոտյանը՝ նշելով, որ ինքը պարտավոր է մինչև մայիսի 31-ը ներկայացնել եկամուտների հայտարարագիր, ինչի համա անհրաժեշտ է և՛ համակարգչային կապի, և՛ ամապատասխան թույլտվությունների, որ կարողանա ստանալ մի շարք տվյալներ։

«Հաշվի առնելով, որ խնդիրը հղի է նաև հերթական սարքոցիով, որ եթե հանկարծ այս հայտարարագիրը ժամանակին չներկայացնեմ, քրեական գործ կարող է սարքվել՝ դիմել եմ ՔԿՀ պետին, որ դիմի ԿԿՀ՝ պարզելու, թե ինչպես են ազատությունից զրկված անձինք հայտարարագրեր ներկայացնում, որը չներկայացնելու դեպքում քրեական պատասխանատվություն է նախատեսվում, բայց չկան դրա համար պայմաններ»,- ասաց Աշոտյանը՝ հավելելով, որ գրություն է ստացվել առ այն, որ իրեն պետք է համակարգիչ տրամադրվի, ուստի, Աշոտյանը միջնորդեց, որ դատարանը թույլ տա՝ իրեն տրամադրվի համակարգիչ՝ ունենալով լիարժեք հնարավորություն՝ ստանալու տվյալներ՝ բանկային, հիպոթեքի մարման, անձնական և այլն, կամ, դատարանը որոշում կայացնի՝ նշելով, որ կալանավորված անձը չի կարող հայտարարագիր ներկայացնի՝ ազատելով հնարավոր քրեական պատասխանատվությունից։

Դատավոր Դոլմազյանը նշեց՝ կարծում է՝ քրեական պատասխանատվության չեն ենթարկի, քանի որ անձն իր կամքից անկախ հանգամանքներում է զրկված հայտարարագիր ներկայացնելու հնարավորությունից։ Նախաահողը նաև նշեց, որ անհրաժեշտության դեպքում դատարանը քայլեր կձեռնարկի։ Դատական նիստը հետաձգվեց։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո