Փաստ ինֆո

Այս օրերին ՀՀ-ում ներքաղաքական բուռն իրադարձություններ են և Կիրանցից սկիզբ առած ազգային-ազատագրական շարժումը արդեն Երևանում է: Աստվածային մեծ աուրա և էներգիա կա: Պատահական չէ, որ շարժումը գլխավորում է Հայ առաքելական եկեղեցին: «ՓաստԻնֆոյի» եթերում ասել է «Հայրենիք» կուսակցության խորհրդի անդամ, քաղաքագետ, պրոֆեսոր Խաչիկ Գալստյանը:

Բանախոսի դիտարկմամբ, նախորդ դառը փորձերը հաշվի առնելով, գուցե իշխանությունները որդեգրեն շարժումը մաշեցնելու մարտավարությունը, սակայն շարժման կազմակերպիչները այս անգամ իրապես տիրապետում են իրավիճակին և կկարողանան այնպես գեներացնել քաղաքական գործընթացները, որ մենք ունենանք վերջնական հանգրվան և համատեղ ուժերով ազատվենք չարիքի իշխանությունից:

Անդրադառնալով իմպիչմենտի գործընթացին՝ բանախոսը նշեց, որ ՀՀ Սահամանդրության մեջ նշված է, որ ՀՀ ԱԺ-ում ներկայացված յուրաքանչյուր պատգամավոր առաջնորդվում է սեփական խղճով և մտքով, այլ ոչ թե Ն. Փաշինյանի ցանկությամբ: Այսօրվա իրողությունները այլ են, իշխանությունները լեգիտիմությունը կորցրել են:

Քաղաքագետը կարծում է, որ քաղաքական տեսանկյունից, իմպիչմենտի գործընթացի ձախողման դեպքում, ընդդիմադիր պատգամավորները պետք է վայր դնեն մանդատները: «Կարծում եմ, որ կազմակերպիչները ունեն «Պլան Բ»: Քանի որ, եթե չստացվի հասնել վարչապետի հրաժարականին, ապա գոնե, պրոցեսները տեղափոխել արտահերթ խորհրդարանական ընտրությունների դաշտ»,- ասել է Խ. Գալստյանը:

Անդրադառնալով Ռուսաստանում կառավարության նոր ձևավորված կազմին՝ պրոֆեսորը նշեց, որ Ռուսաստանում տեղի ունեցած նախագահական ընտրությունները և իշխանության իրավահաջորդության ապահովումը, Ռուսաստանի արտաքին քաղաքականության մեջ շեշտադրումների որոշակի փոփոխություններ կառաջացնեն: Պաշտպանության նախարարի փոփոխությունը ռազմական առումով էլ ավելի կկոշտացնի Ռուսաստանի քաղաքականությունը ուկրաինական ճակատում: Հավաքական արևմուտքի հետ կոնսենսուսն էլ որոշակի ճաքեր է տալիս, քանի որ Ուկրաինայն աջակցությոնը բավական թանկ է նստում Արևմուտքի վրա: Բացի այդ, ԱՄՆ-ն արդեն մտել է նախընտրական թոհուբոհի մեջ: Ն. Փաշինյանի մնալու դեպքում, հակառուսական երկրորդ ճակատի առաջամարտիկը լինելու է ՀՀ-ն:

«Ս. Լավրովի վերանշանակումը նշանակում է, որ Ռուսաստանի արտաքին քաղաքականության ուղեգիծը պահպանվելու է, սակայն մենք պետք է Ռուսաստանի Հարավկովկասյան քաղաքականության որոշակի փոփոխություններ հաշվի առնենք»,- ասել է Խ. Գալստյանը:

Մանրամասները՝ տեսանյութում:

Աղբյուր` Փաստինֆո