Փաստ ինֆո

ԵՊՀ մուտքի մոտ այսօր «Տավուշը հանուն հայրենիքի» շարժման առաջնորդին դիմավորել է նաեւ ԵՊՀ պրոռեկտոր Էլինար Ասրիյանը։

Հիշեցնենք, որ երեկ տեղեկություն էր տարածվել առ այն, որ պրոռեկտորը սպառնացել է համալսարանից հեռացնել դասերին չմասնակցող ուսանողներին։ Երեկ այդ մասին բարձրաձայնեց նաեւ Բագրատ Սրբազանը՝ նշելով, որ, ըստ տեղեկության, դեկանատի հետ հանդիպմանը Ասրիյանն ասել է, որ պետք է նշանակել ուսանողների բացակաները ու եթե հարկ լինի՝ 1000 հոգու էլ կհեռացնի համալսարանից՝ Սրբազանն ասաց. «Ամենամեծ բացական նրանք են, ովքեր այդպես խոսում են։ Ես անկեղծորեն չեմ հավատում, որ այդպես ասել է»,-ասել էր Սրբազանը՝ նշելով, որ այսօր ԵՊՀ- է գնալու ՝ ճշտելու տեղեկությունը։

Ասրիյանը եկավ ու հայտնեց, որ շատ վիրավորված է, որ կարելի է զրպարտել մարդուն։ «Եթե չէիք հավատում՝ պիտի չասեիք դա, պիտի չասեիք այն, ինչին չեք հավատում։ Ես շատ բարկացած եմ, սուտ ասել չի կարելի»,-ասաց Ասրիյանը։

Սրբազանը ասաց, որ ընթերցել է մամուլում արձանագրվածը, վստահեցրեց, որ չի հավատում լուրերին, բայց իրավունք չունի չճշտելու։ «Նույնիսկ ասել եմ, որ եթե ճիշտ չէ, ուրեմն ներղություն է խնդրում, եթե ճիշտ չէ՝ վստահ է, որ կհերքի»։

Ասրիյանը ասաց, որ ուրախ է, որ Սրբազանն ընդունում է, որ կարող էր սխալվել։ «Շնորհակալ եմ, որ ասել եք, որ չեք հավատում։ Հայտարարում եմ, որ երեկ որևէ հանդիպում, որևէ դեկանի հետ տեղի չի ունեցել։ Այստեղ կան դեկաններ, որ կարող են դա հաստատել։ ԵՊՀ-ն ուսանողակենտրոն կառույց է և այստեղ յուրաքանչյուր ուսանողի իրավունքը պաշտպանված է։ Ուսանողակենտրոնությունը նշանակում է նաև, որ ուսանողները պետք է իրացնեն իրենց իրավունքը նաև լսարանում, և ցանկացած ուսանող, որ եկել է դասի, պետք է կարողանա ստանալ այն գիտելիքը, որի հետևից եկել է, նրան լսարանից հանել չի կարելի, ով ուզում է հետևել Ձեզ՝ կարող է հետևել, ով ուզում է մնալ լսարանում՝ պետք է մնա լսարանում »։

Սրբազանը ասաց, որ զրպարտությունը դատապարտելի է։ «Այսօր մենք եկել ենք տեղեկությունը ստուգելու և ես շնորհակալ եմ այն ամենի համար, ինչ այսօր ասվեց»,-ասաց Սրբազանն՝ ընդգծելով, որ ինքը որևէ ուսանողի լսարանից չի հանել, հրավիրել է ուսանողներին, նրանք էլ հետևել են իր խոսքին։

Աղբյուր` Փաստինֆո