Փաստ ինֆո

Բագրատ Սրբազանը Երևանի Սուրբ Գրիգոր Լուսավորիչ մայր եկեղեցում այսօր մասնակցել է մատուցվող Սուրբ Պատարագին:

Քրիստոսի Համբարձման տոնի հաջորդ կիրակի օրը Հայ Առաքելական եկեղեցին նշում է Երկրորդ Ծաղկազարդը։

«Բացե՛ք ձեր աչքերը ասում է Տեր Աստված:Ճանաչե՛ք ինձ, ճանաչե՛ք ճշմարտությունը,ճանաչե՛ք ինքներդ Ձեզ:Մեր երթը անմահության երթն է լինելու կյանքում: Ովքեր այսօր նահատակության փառք ու պսակի մեջ են, սպասում են մեզ, ոչ թե նզովված գնալու , այլ փառավորված՝ գրկախառնվելու իրենց հետ: Տե՛ր թող մեր աչքերը բացվեն, Ամեն»,-Սուրբ Գրիգոր Լուսավորիչ եկեղեցում քարոզի ժամանակ, դիմելով հավատացյալներին, ասաց Տավուշի թեմի առաջնորդ Բագրատ արքեպիսկոպոս Գալստանյանը:

Սրբազանը բարի կիրակի մաղթեց բոլոր ներկաներին ասաց, որ շատ վայրերում ու ուրիշ հանգամանքներում է տեսնում հավաքվածներին, բայց ոչ բոլորին է բախտ վիճակված լինել Տիրոջ Սուրբ խորանի առաջ և միասին:Նա ասաց, որ այս կիրակին երկրորդ Ծաղկազարդն է: «Սուրբ Հարությունից հետո վերջին Կիրակին է, մեր հայրերի անվանած Ոսկեշղթա:Առաջին Ծաղկազարդը Տիրոջ մուտքն է Երուսաղեմ, մարդկային սրտի մեջ, որտեղ բնականից սիրտը ցնծում և ուրախանում է Տիրոջ ներկայությամբ:

Երկրորդ Ծաղկազարդը Համբարձումից հետո, այդ Երկնային Թագավորության հռչակման իրականացման մասին է:Երբ մեր հավատքի հայր Սուրբ Գրիգոր Լուսավորիչը գտնվում էր բանտում ու ըստ ավանդության հրեշտակիներն էին սպասարկում նրան: Եվ այդ կիրակի 4-րդ հրեշտակը բացակայեց, հետո Գրիգոր Լուսավորիչին նա ասաց,որ դիմավորում էին թագավորների թագավորին: Բագրատ սրբազանը հիշեց նաև աստվածաշնչյան չափազանց անտեսված երկու մարդ ու պատմությունը, երբ մեծ աղմուկի ու մարդկանց բազմության մեջ դժվարությամբ, ձայնը լսելի դարձնելու համար բղավելով օրհնություն են խնդրել Հիսուսից, ով իմանալով, թե ինչ են ուզում , այնուամենայնիվ հարցրել էր անտեսվածներին, թե ինչ կուզեն , որ ինքն անի իրենց համար:

Անտեսվածների խնդրանքի ձևն էր,կարևոր, նրանք չեն ասել, բացի՛ր մեր աչքերը, բժշկի՛ր , այլ դիմել են, թե , այնպե՛ս արա Տեր, որ մեր աչքերը բացվեն:Այս օրինակով Բագրատ սրբազանը բացատրեց մեր այսօրվա վիճակը, որ մենք ինքներս կարողանանք մեր ջանքով մեր աչքերը բացել:Նա դիմեց ներկա հավատացյալներին ու ասաց, որ Մենք անընդհատ ձգտում ենք, որ ինչ-որ մեկը մեզ համար անի, բայց շատ քիչ ջանք ենք թափում, որ ինքներս ինչ-որ բան անենք: Հասարակությունը կամ անձիք խուսափում են իրենց բաժին պատասխանատվությունից և այն տարածում են բոլորի վրա և հավաքական անպատասխանատուն է սկսվում:Միևնույն ժամանակ արդարացնում իրենց չգործելը՝ պայմանավորելով հազար ու մի հանգամանքով:

Սրբազանը նշեց, որ մեր Տերն այդ չէր ուզում:Աստված հստակ կերպով հնարավորություն ու ժամանակ է տալիս մարդուն , որպեսզի ինքը կրի իր պատասխանատվությունը,որպեսզի Աստված օգնական լինի նրան, ոչ թե մարդու փոխարեն կրի այն ամբողջությամ։ Ստի ու կեղծիքի օրեր են , թշնամության և ատելության օրեր են և ամենամեծ մեղքի՝ ինքնաարդարացման օրեր են , մենք այդ երևույթով կուրացել ենք:Չենք կարողանում խորքով գնահատել ճշմարիտ ճանապարհը, հաշտության ճանապարհը, սերը, ներումը, սիրո տարածումը և ճշմարտության ու արդարության հետապնդումը:Մեր խնդրանքը պետք է լինի, որ մեր աչքերը բացվեն, մեր հոգու աչքերը բացվեն:

Տավուշի թեմի առաջնորդն աղոթեց, որ բացվեն մեր աքերը: «Մենք հավատում ենք, որ կարող ենք անել դա և պետք է անենք դա մեր գալիքի համար, աշխարհին ներկայանոլու համար, մեր երկրի համար:Դառնալու համար ընտրյալ ժողովուրդ:Աշխարհը պետք է տեսնի, որ կամք , ուժ ունեցող ժողովրդի զավակների հետ գործ ունի»,- ասաց Բագրատ սրբազանը:

Աղբյուր` Փաստինֆո