Փաստ ինֆո

Կարծում եմ՝ նախ Բագրատ Սրբազանին է պետք հարցնել իրեն վարչապետի թեկնածու առաջադելու մասին, որը այսօր ասաց, որ նման մտադրություն չունի, բայց եթե դա լինի ժողովրդի որոշումը, ժողովուրդը պահանջի՝ ուրիշ հարց է։ Այս մասին «Փաստինֆոյի» հետ զրույցում ասաց քաղաքագետ Արթուր Խաչիկյանը՝ անդրադառնալով Բագրատ Սրբազանին վարչապետի թեկնածու առաջադելու ՀՀ ԱԳ նախկին նախարար Վարդան Օսկանյանի առաջարկին։

«Իմ կարծիքով, նախ պետք է որոշվի, թե ինչպես է հանգուցալուծվելու այս իրավիճակը, մեր այսօրվա ղեկավարությունը պետք է հեռանա և նոր մարդիկ պետք է գան։ Նրանք պետք է ներկայացնեն իրենց ծրագիրը, խոստանան, որ այլևս սուտ չեն ասելու ժողովրդին։ Դրանից հետո՝ թող ժողովուրդը որոշի։ Իհարկե, հոգևորականին առաջադրելը անսովոր քայլ է, սովորաբար այդպես չի լինում, բայց այս իրավիճակը ճակատագրական է, սա քաղաքականության հարց չէ, սա հայրենիք փրկելու հարց է, մեր սահմանները պաշտպանելու հարց է։

Կարող է անցումային շրջան լինել և եկեղեցին ղեկավարի այդ անցումային պրոցեսը, ապա գան նոր քաղաքական ուժեր, որոնց ժողովուրդը պետք է ընտրի, բայց դա, կարծում եմ, պետք է հարցնել շարժման ղեկավարներից»։

Աղբյուր` Փաստինֆո