Փաստ ինֆո

Քվե ապահովող ընտրողները կարող են նաեւ իրենց ընտրած վարչապետին զրկել պաշտոնից,- «Փաստինֆո»-ի հետ զրույցում արձանագրել է քաղտեխնոլոգ Արմեն Բադալյանը՝ անդրադառնալով վերջին երկու օրերին մայրաքաղաքում կտրուկ սրված ներքաղաքական իրավիճակին։

Հիշեցնենք, որ երեկ Հանրապետության հրապարակում տեղի ունեցավ Տավուշի թեմի առաջնորդ Բագրատ Սրբազանի նախաձեռնած համազգային հանրահավաքը, որին մասնակցում էր տարբեր հաշվարկներում 65.000-80.000 մարդ։Հանրահավաքում Սրբազանը հնչեցրեց Նիկոլ Փաշինյանին ուղղված հրաժարականի պահանջը։

Քաղտեխնոլոգը արձանագրեց, որ, իսկապես, հանրահավաքը բավականին բազմամարդ էր, իսկ ոգեւորությունը՝ մեծ, ինչը տեսանելի էր։Սակայն չհամաձայնեց այն դիտարկմանը, որ հենց այդ բազմամարդությունն էր պատճառը, որ քպականները մի պահ լռություն էին պահպանում ու չէին շտապում արձագանքել։ Ա.Բադալյանի դիտարկմամբ՝ ՔՊ-ն լիդերի կուսակցությունն է ու բոլորը սպասում էին հրահանգի։

Նշենք, որ Ն.Փաշինյանի ընտանիքին պատկանող ԶԼՄ-ում հայտնվեց հրապարակում, որով հակապետական էր որակվել հրապարակում տեղի ունեցող ակցիաները, ապա արդենքպականները ֆեյսբուքում սկսեցին ֆլեշմոմբ՝ տարածելով Նիկոլ Փաշինյանի լուսանկարը՝ նրան ներկայացնելով որպես «լեգիտիմ» ղեկավար։

«Պարզապես հրահանգն էր այդպիսին, եթե հրահանգ իջներ, որ մի հատ սպիտակ առյուծ պետք է տեղադրեն ու գրառում անեն, այդ սպիտակ առյուծը կդնեին»,- ասաց Ա. Բադալյանը։ Արդյոք լեգիտիմության վրա շեշտադրումը չի վկայում, որ հենց իրենք են կասկածի տակ դնում այն՝ քաղտեխնոլոգը ձեռնպահ մնաց ենթադրությունից, բայց նկատեց.«Եթե լեգիտիմ ընտրվում ես, լեգիտիմությունը տարածվում է քո ընտրության ողջ ժամանակահատվածի համար՝ քվերակության օրինականության հիմքով։ Դրանից հետո, թե ի՞նչ կանես, ինչ չես անի՝ լեգիտիմ ես մինչև հաջորդ ընտրություն։Կարող եմ բերել բազմաթիվ օրինակներ, երբ ո մի բան ասում են ու լրիվ հակառակ գործընթաց են իրականացնում։Իրենց ընտրվելու գործընթացը եղել է սահմանադրության և օրենքների համապատասխան։Դա կապ չունի ծրագրի կատարողականի հետ, դա կապ ունի իշխանությունն ստանձնելու օրինականության հետ։ Երբ ինքն այլևս չի կատարում այն ծրագրերը, ինչի համար եկել է իշխանության կամ կորել է վստահությունը տվյալ ղեկավարի նկատմամբ, ապա ընտրողն իրականացնում է անհնազանդության ակցիաներ՝ փողոց փակել, երթեր, ցույցեր, հանրահավաքներ»։ Քաղտեխնոլոգն ընդգծեց, որ նույն այդ քվեն ապահովող ընտրողները իրենց ընտրյալին կարող են զրկել վարչապետի պաշտոնից։

Օրինակ, ինչպես հայտնի է Փաշինյանը բավականին շատ քվե էր ստացել նաեւ Տավուշում, մասնավորապես Կիրանցում, բայց այսօր կիրանցեցիները դժգոհ են նրա գործունեությունից եւ հրապարակավ հայտնում են իրենց բողոքի ձայնը։

Տեղի ունեցող անհնազանգության ակցիաները՝ տրասպորտի արգելափակման ձևերը, դասադուլները, գործադուլները և այլ միջոցառումները, բողոքի արտահայտման օրինական ձեւեր են։

«Այդ ամենն արվում է, որպեսզի նրանք միանան և անվստահություն հայտնեն երկրի վարչապետին, համաշխարհային քաղաքականության մեջ օրինական ընդունված մեխանիզմների տեսակներ են դրանք»,- նշեց Արմեն Բադալյանը։

Աղբյուր` Փաստինֆո