Փաստ ինֆո

Տավուշի սահմանազատումը և ՀՀ ԶՈւ հետքաշումը կարող են ճեղքվածք ստեղծել պաշտպանության ոլորտում` առանց հակառակորդի կողմից որեւէ ջաների, - այս մասին այսօր լրագրողներին ասել է ԳՇ պետի նախկին տեղակալ Տիրան Խաչատրյանը։

Նրա արձանագրմամբ՝ տասնամյակներ շարունակ այնտեղ կառուցվել են հզոր պաշտպանական ամրություններ՝ հաշվի առնելով տեղանքը, ռելիեֆը, հակառակորդի դիրքը և շատ այլ գործոններ։ Եվ այն բացը, որն առաջանում է զորքերի հետքաշման արդյունքում, չափազանց դժվար կլինի լրացնել։

«Այն ճեղքվածքը, որն առաջանալու է, շատ շատ տարիներ են պետք՝ լրացնելու, փակելու համար։ Արդյո՞ք կուզենան փակել, ի՞նչ զարգացումներ կլինեն։ ՀՀ-ի լինելության հարց է առաջանում», նշել է զինվորականը։

Գեներալը մտավախություն ունի, որ այն բանից հետո, երբ բանակային ստորաբաժանումները հետ քաշվեն զբաղեցրած բնագծերից, հակառակորդը համեմատաբար հեշտությամբ կարող է իր ուժերն ու միջոցները շարժել դեպի Հայաստանի տարածքի խորքը և սկսել ծավալվել:

Ինչ վերաբերում է հնարավոր պատերազմին, ապա Տ. Խաչատրյանը նշել է, որ լայնամասշտաբ պատերազմը ներկայումս քիչ հավանական է համարում։

«Ես այդպիսի նախադյալներ չեմ տեսնում։ Կարող է սադրանքներ լինեն , բայց լայնամասշտաբ պատերազմ չի կարող լինել։ Կարող է նույնիսկ այս իշխանության ու հակառակորդի համաձայնությամբ լարվածությունը մեծացվի, բայց միաջազգային հանրության համար լայնամասշտաբ պատերազմի արդարացում չեմ տեսնում»,- ասել է ԳՇ պետի նախկին տեղակալը։

Աղբյուր` Փաստինֆո