Փաստ ինֆո

Այս շարժումն ուղղորդված է, իհարկե ուղղորդված է Աստծո կողմից: Այս մասին Գյումրիում լրագրողների հետ զրույցում ասաց Շիրակի թեմի առաջնորդ Միքայել արքեպիսկոպոս Աճապահյանը՝ անդրադառնալով Նիկոլ Փաշինյանի նախօրեին արած հայտարարությանը, թե այս շարժումը ուղղորդված է:

«Մենք ուզում ենք այս կեղծիքից, ստից, խաբեությունից, նվաստացումից փրկել բոլորին, ներառյալ այդ խաբողներին, նվաստացողներին»:

Հարցին, թե արդյոք իրենք են նախաձեռնել երթը՝ սրբազանն ասաց, որ ինքն ուղղակի ժողովրդի պահանջին ընդառաջ է գնացել ու պատասխանատվությունը սրբազանը նկատեց, որ իրենք դեմ չեն սահմանազատմանը, բայց դա չի կարող լինել շանտաժի միջոցով։

«Ոչ թե պետք է լինի սահմանազատում, որին կհաջորդի խաղաղության պայմանագիրը, այլ խաղաղության պայմանագիրը ստորագրելուց հետո պետք է սկսվի սահմանազատումը: Ոչ մի քաղաքակիրթ երկիր չի կարող սպառնալիքով գծել սահմաններն այնպես, ինչպես ինքն է ուզում: Սահմանազատում չի կարող լինել պատերազմի սպառնալիքի, շանտաժի միջոցով: Սա այնքան տրամաբանական բան է, բայց երկրի ղեկավարը սա չի հասկանում, կամ իրեն հայտնի կենդանու տեղն է դրել»:

Դիտարկմանը, թե 2018-ին ինքը ևս սատարել է համաժողովրդական շարժմանը, արքեպիսկոպոսն ասաց, որ ինչպես բոլորը, այնպես էլ ինքը սխալվել է, բայց միայն երկու օր։

«Ես ապրիլի 25-ին արդեն սխալս հասկացել եմ: Ես այդ սխալի համար ցավում եմ»:

Արքեպիսկոպոսը նաև նշեց, որ համոզված է, որ իշխանությունը վախեցած է այս շարժումից: «Ես միշտ էլ չեմ կիսել տեսակետը, որ հոգևորականը չպետք է զբաղվի քաղաքականությամբ։ Ես միշտ էլ ակտիվ քաղաքական կարծիքներ հնչեցրել եմ բոլոր իշխանությունների ժամանակ: Քաղաքական կյանքով չզբաղվելը վերաբերում է պետական կառավարման մեջ լինելու ձգտում չունենալուն: Մենք նման ցանկություն, նման ամբիցիա չունենք, բայց անտարբերությունը մահացու մեղք է, մենք չենք կարող լինել անտարբեր Հայաստանում տեղի ունեցող պրոցեսներին, որոնք վտանգում են մեր պետականությունը և անվտանգությանը»,- ասաց սրբազանը:

Աղբյուր` Փաստինֆո