Փաստ ինֆո

Այսօր հնարավոր չէ միանշանակ ասել, թե ինչ կանի իշխանությունը և ինչ որոշում կկայացնի Նիկոլ Փաշինյանը, որքանով է հնարավոր ուժի կիրառումը Երևան եկող երթի մասնակիցների նկատմամբ, բայց ես հույս ունեմ, որ 2008 թ-ին հանրությանը ակտիվ բախումների տանող քաղաքացի Փաշինյան Նիկոլը հասկացել է, որ հայ ժողովրդին բախման տանելն ունի հետևանքներ և որևէ արդարացում չի լինելու։ Այս մասին «Փաստինֆոյի» տաղավարում ասել է հանրային կառավարման փորձագետ Արթուր Գևորգյանը՝ միաժամանակ ավելացնելով, որ չպետք է նաեւ մոռանալ, որ գործ ունենք մարդու հետ, ով ամառվա շոգին էլ է կեպիով ման գալիս

«Փաշինյանը հրամանատար չէ իր էությամբ։ Իր վախերից դրդված, միջազգային պայմանավորվածություններից ելնելով՝ նա անպայման կիրառելու է հակազդեցություն, թե ինչպիսին կլինի այդ հակազդեցությունը՝ կախված կլինի նրա հետ, թե որքան ուժեղ կգտնվի երթը, ինքան խոհեմ կգտնվենք մենք ու որքանով կկարողանանք կանխարգելել բախումը»,- նշել է փորձագետը։

Միաժամանակ նա չի բացառել հնարավոր սադրանքները, բայց նաեւ ավելացրել է, որ պայքարը հենց նրանով է պայքար, որ պետք է կարողանաս պայքարից հաղթող դուրս գալ, իսկ պայքարը ծաղիկներ կամ ծառից մրգեր հավաքելով չէ։ «Ժողովրդի, հանրության քանակից կախված՝ հնարավոր է ամեն բան կանխել, ամեն դեպքում՝ Փաշինյան Նիկոլն ամեն բան անելու է իշխանության մնալու համար, իսկ մենք ամեն բան անելու ենք նրան հեռացնելու համար»,-ասել է Արթուր Գեւորգյանը։

Աղբյուր` Փաստինֆո