Փաստ ինֆո

Կիրանցի համայնքապետ Կամո Շահինյանը հայտարարել է, թե ոչ բոլոր ականներն են հանվել, իսկ ադրբեջանական գյուղի 25 տոկոսն էլ մնում է Հայաստանին։

Նրա փոխանցմամբ՝ ականազերծումն իրականացվել է սահմանի գծով, որտեղ գիծ կա, իսկ մյուս հատվածում ականները մնացել են։

Նշելով, որ սահմանազատումը դեռ չեն ավարտվել, այդուհանդերձ, Շահինյանը շտապել է գոհունակություն հայտնել։ «Ինչ տեսել պատկերացրել եմ, որ ավելի վատ է լինելու, դեպի դրականն է։ Ես ինչ խոսում եմ՝ հենասյուների մասին եմ ասում, որ դրվել են»,- լրագրողներին ասել է Կիրանցի համայնքապետը ու ավելացրել, թե ադրբեջանական գյուղից մի 25 տոկոսն էլ մնում է Հայաստանին։

«Մենք ունեինք մի բարձունք՝ «Խաչի յալ» կոչվող, ուղիղ խաչի վրա էր այդ կետը, այդտեղից, մի 25 մ իջեցրել են, որն իրականում մեր մշակածն է»,- ասել է Շահինյանը ու շնորհակալություն հայտնել այն մարդկանց, որոնք դա արել են։

Համայնքապետը նշել է, որ հիմա մնացել է ամենացավոտ հատվածի սահմանազատումը։ Ըստ նրա՝ կտոր կար, որ մտածել են գետի այս կողմը պետք է լինի, բայց սյուններն այն կողմում են դրված։

«Պատկերացրեք, էն հողերը, որ 9,5 հա կորցնում էինք, դա իջեցված է գետով, մեր հողերի ոչ մի սմ այնտեղ չի անցնում: Հողեր կան սեփականաշնորհված 4500 մետրանոց, եթե ուղիղ գծով ես վերցնում, մեջն է ընկնում, մերն է լինում, ասացին՝ մենք կարանք ուղիղ գծով քաշենք, կարանք՝ փակագիծ: Հիմա գյուղի եւ կամրջի մասով սառեցված է, էս պահին երեւի բանակցություններ են: Տեսա, որ թողեցին գնացին ու ասացին՝ սառեցված է»,- ասել է համայնքապետը՝ նշելով, որ մինչ այս պահը կատարված աշխատանքից գոհ է։

Աղբյուր` Փաստինֆո