Փաստ ինֆո

Մենք հատուկ եկել ենք՝ աջակցություն հայտնելու Սրբազան Հոր առաջնորդությամբ շարժմանը։ Այս շարժումը կարևոր նշանակություն ունի, այն մեր գոյաբանական պայքարի մաս է, որովհետև այն պրոցեսը, որը տեղի է ունենում, այսպես կոչված, «սահմանազատումը»՝ սահմանազատում չէ, անօրինական գործընթաց է, միջազգային որևէ պահանջի չի համապատասխանում, ամբողջությամբ խաթարում է մեր իրավունքները, երկրի անվտանգության համակարգը խաթարող պրոցես է։ Այս մասին լրագրողների հետ զրույցում ասաց ՀՀ նախկին ՄԻՊ Արման Թաթոյանը, որը միացել է Տավուշի թեմի առաջնորդ Բագրատ Սրբազանի առաջնորդությամբ շարժմանը։

«Ավելին, հայտարարում են, թե այս պրոցեսը (սահմանազատման հեղ․) ինչ-որ հանձնաժողովների իրավական ակտերի հիման վրա։ Ես ասեմ ձեզ՝ այս հանձնաժողովները որևէ իրավական հիմք չունեն գործունեության։ Բացի այդ, այս պրոցեսը կոպտորեն նաև հակադրվում է մեր շահերին, որովհետև կարծրատիպ է ստեղծվում, որ իրականացվում է օրինական սահմանազատում։ Դա է պատճառը, որ նաև տարբեր երկրներ, միջազգային կազմակերպություններ անգամ ողջունում են այս գործընթացը՝ ասելով, թե ուրախ են, որ սա համաձայնագրի հիման վրա է տեղի ունենում։ Հատուկ եմ ասում՝ չկա որևէ համաձայնագիր, ինչի մասին է վկայում արդարադատության նախարարության, կառավարության տարածած հաղորդագրությունները, որոնք կոպիտ խախտումներով են»,- ընդգծեց Թաթոյանը։

Նա նաև մտահոգություն հայտնեց, որ խիստ վտանգավոր գործընթաց է սկսվել՝ Հայ Առաքելական Եկեղեցու նկատմամբ։
«Տեսանք,թե ինչպես Խորհրդարանում՝ կառավարող խմբակցության անդամները բացահայտ ձևով թիրախավորում են ՀԵԿ-ին, մասնավորապես՝ Բագրատ Սրբազանին, ինչը քրեական օրենսգրքով նախատեսված արարք է։ Սրանով նաև հիմքերին են հարվածում ՀԵԿ»,- ասաց Թաթոյանը։

Ինչ վերաբերում է հարցին, թե արդյո՞ք հնարավոր է, որ ինքը լինի վարչապետի թեկնածուն, Թաթոյանը նշեց՝ չի եկել այդ հարցը քննարկելու։

Աղբյուր` Փաստինֆո