Փաստ ինֆո

Բացարձակ տխմար փաստարկ է պնդելը, որ եթե սահմանազատումը այլ հատվածից սկսվեր՝ չէր ապալեգիտիմացնելու Ադրբեջանի հարձակումը Հայաստանի վրա։ Ստացվում է, որ մինչև հիմա Ադրբեջանը շատ լեգիտի՞մ է մեր դեմ պատերազմ վարել։ Այս մասին «Փաստինֆո»-ի հետ զրույցում ասաց քաղաքագետ Սուրեն Սուրենյանցը։

«Եթե Փաշինյանի տրամաբանությամբ շարունակենք՝ Ադրբեջանը լեգիտիմ իրավունք է ունենալու մեր տարածքները մեզ չհանձնելու, որովհետև դրանք բնակավայրեր չեն։ Ինչ տարբերություն, քո տարածքային ամբողջականության որ մասի նկատմամբ է ոտնձգություն եղել, դա բնակավայր է, ենթակառուցվածք է, թե ձյունապատ սարի գագաթ։ Նույնպիսի մի տխմարություն էլ 2 տարի առաջ էր ասում, թե արժի՞ մի գագաթի համար պատերազմել, որը տարվա կեսը ձների մեջ է»,- նկատել է Սուրենյանցը։

Անդրադառնալով 4 գյուղերի հանձնելիս Ալմա-Աթայի հռչակագրի վրա հիմնվելուն, այն դեպքում, երբ այս փաստաթուղթն ամենևին էլ դրված չէ երկու երկների սահմանազատումների հանձնաժողովների աշխատակարգի հիմքում, ավելին՝ այսպես կոչված խաղաղության պայմանագրի հիմքում, Սուրենյանցը նշեց, որ դա վկայում է, որ այն ինչ կատարվում է հիմա՝ պարզապես միակողմանի զիջում է։

Փաստենք, որ այսօր տեղի ունեցած մամուլի ասուլիսում է Նիկոլ Փաշինյանը հայտարարել, որ մայիսի 10-ին Ալմաթիում նախատեսված Հայաստանի ու Ադրբեջանի արտգործնախարարների հանդիպմանը քննարկվելու է Ալմաթիի հռչակագիրը խաղաղության պայմանագրում ներառելու հարցը։ Մինչդեռ՝ այսօր պաշտոնական Երեւանը, վկայակոչելով Ալմաթիի հռչակագիրը, Բաքվին է հանձնում Տավուշի 4 գյուղերը։

«Այս զիջումից հետո միայն սկսվելու է դելիմիտացիան և դեմարկացիան, բայց ես վստահ չեմ, որ այս հանձնումից հետո՝ Ադրբեջանը սահմանազատման գործընթացը շարունակելու է։ Ադրբեջանը տարբեր հատվածներից տարբեր պատրվակներով ստանում է այն, ինչ իրեն պետք է։ Դելիմիտացիա-դեմարկացիայի անվան տակ, օրինակ, Սյունիքում մեջտեղ կբերի Նոյեմբերի 9-ի փաստաթուղթը ու այդպես շարունակ։ Ադրբեջանը դելիմիտացիայի-դեմարկացիայի հարցում խիստ շահագրգռություն չունի, որովհետև կարծում է, որ դեռ ստանալիք ունի»,- նշել է նա։

Հարցին, թե արդյոք այն, ինչ հիմա կատարվում է Տավուշում՝ հանցագործություն չէ, նա պատասխանեց, որ ցանկացած պարագայում՝ դրա իրավական գնատահական պետք է տրվի և իշխանափոխությունից հետո կտրվի։ «Եթե սա դելիմիտացիա-դեմարկացիա է, ապա խախտվել է ՀՀ սահմանադրությունը, որովհետև ընթացակարգ կա, ըստ որի՝ միջպետական հանձնաժողովները կազմվում են միջպետական համաձայնագրի հիման վրա, որը պետք է պարտադիր վավերացվի ԱԺ-ի կողմից։ Այսինքն, խախտվել է ՀՀ Սահնմանադրությունը, իսկ եթե որևէ պաշտոնատար անձ խախտում է ՀՀ Սահմանադրությունը, ապա դա քրեորեն հետապնդելի արարք է»։

Աղբյուր` Փաստինֆո