Փաստ ինֆո

Մենք եկեղեցու հետ չենք հակամարտում: Եկեղեցին մեզ հետ հակամարտում է, թե ոչ՝ իրենք պետք է պատասխանեն այդ հարցին: Այս մասին այսօր հրավիրված ասուլիսում ասաց ՀՀ վարչապետ Նիկոլ Փաշինյանը՝ ընդգծեց, որ եթե որոշ հոգևորականներ քաղաքական հայտ են ներկայացնում, դա նշանակում է, որ նրանք խոստովանում են հոգևոր առաջնորդություն իրականացնելու գործում իրենց ձախողումը կամ անկարողությունը:

«Այսօր կան ՀՀ-ում հոգևորականներ, որոնք իրոք հոգևոր առաջնորդություն են իրականացնում: Հոգևոր առաջնորդությունը մարդկանց օգնելը, աջակցելն է Աստծո հետ հարաբերություններում, որ մարդն իր ներաշխարհի հետ ներդաշնակություն գտնի: Այդպիսի հոգևորականներ կան, որ այդ գործունեությունն են իրականացնում»:

Նրա դիտարկմամբ՝ քաղաքական հայտ ներկայացնում են այն հոգևորականները, որոնք հոգեւոր առաջնորդությունը ձախողել են, մարդկանց Աստծո հետ կապելու առաքելությունը ձախողել են: «Ցավոք, այդ վիճակում են շատ բարձրաստիճան հոգևորականներ: Ոչ բոլորը, բայց շատերը:

Վախենամ, ամենաբարձր մակարդակում հենց հոգևոր առաջնորդությունն են ձախողել: Կարելի է շփվել հոգևորականների հետ և այդ ընթացքում ոչինչ չլսել Աստվածաշնչի մասին, այլ լսել տարբեր բաների մասին՝ ցեմենտի, բետոնի, ապրանքը տանելու, ներմուծելու, մաքսազերծելու, արտահանելու, փողը այնտեղից հանելու, այնտեղ դնելու, էս մի ավտոն էն մի ավտոյով փոխարինելու, Մերսեդեսի նոր վիպուսկը հին վիպուսկի հետ համեմատելու մասին: Ես զարմացած չեմ, որ իրենք քաղաքական հայտ են ներկայացնում, որովհետև հոգևոր դաշտում նրանք անելու բան չունեն, դա իրենցը չի: Հնարավոր է՝ իրենք Աստվածաշունչը մինչև վերջ չեն կարդացել»:

Նա նաև նշեց, որ Հայ առաքելական եկեղեցու բարձրագույն ղեկավարությունը ձախողել է հոգևոր առաջնորդությունը։
«Այսօր մարդիկ դուրս են եկել, բացահայտ պատերազմ են քարոզում: Ո՞ւմ անունից են պատերազմ քարոզում: Ասում են՝ տաճարը հաղթելու է փողոցին, իսկ փողոցը ո՞վ է, փողոցը մարդիկ են, ժողովուրդն է: Ես այստեղ եմ ժողովրդի կամքով և այստեղ չեմ լինի ժողովրդի կամքով: Այ, մարդիկ 2021-ին էլ էին ասում՝ ի՞նչ կապ ունի ժողովրդի կամքը, իշխանությունը տուր մեզ: Կներեք, էդ իշխանությունն անտե՞ր է, որ տամ ձեզ, ես այն կարող եմ տալ միայն իշխանության տիրոջը: Իշխանության տիրոջ ձեռքին է ամեն օր, այսինքն ժողովրդի ձեռքին է: Ժողովուրդը 2021-ին իր իշխանությունը պատվիրկել է և ես իրականացնում եմ այդ պատվիրակումը:

Եթե ժողովուրդը որոշում է, որ ինքը պատերազմ է ուզում, ես կփորձեմ ժողովրդին ներկայացնել ամեն ինչ, և հիմա դա եմ անում:

Հիմա էլ ասում են՝ ձեզ ինչ, որ նախկիններին ենք ուզում բերել իշխանության: Բայց դուք ո՞վ եք, որ բերեք, կամ չբերեք իշխանության: Դա կարող է անել միայն ժողովուրդը»,- նշեց նա:

Աղբյուր` Փաստինֆո