Փաստ ինֆո

Փորձ է արվում տպավորություն ստեղծել, թե նոյեմբերի 9-ի եռակողմ հայտարարության 9-րդ կետը Ադրբեջանի և Նախիջևանի ինքնավար հանրապետության միջև կապի մասին է, - այսօր տեղի ունեցած ասուլիսի ժամանակ հայտարարեց վարչապետ Նիկոլ Փաշինյանը։

«Ո՛չ, դա դրա մասին չէ, նոյեմբերի 9-ի հայտարարության 9-րդ կետը տարածաշրջանային տնտեսական կապերի ապաշրջափակման մասին է։ Այդ ապաշրջափակման արդյունքում նաև ընդգծված է երկրից երկիր հաղորդակցություն ապահովելու անհրաժեշտությունը։ Այսինքն, թեման, որ կարգավորվում է՝ տարածաշրջանային տնտեսական կապերի ապաշրջափակման մասին է։ Ադրբեջանն այսօր մեր ոչ մի ճանապարհ չի ապաշրջափակել։ Մենք ասել ենք պատրաստ ենք, և կառավարության ծրագիր է շրջանառվում, որ մենք պատրաստ ենք անցման կետերը դնել, որպեսզի ապահովենք այդ հաղորդակցությունն Ադրբեջանի և Նախիջևանի միջև։ Այդ Ադրբեջանն է, որ չի օգտվում այդ հնարավորությունից։ Ընդ որում՝ իրենք ասում են, եթե այդ ճանապարհները Հայաստանը չտա, իրենք Իրանի ճանապարհները կօգտագործենք, մենք ասում ենք՝ նույն պայմանով, ինչ Իրանը մենք պատրաստ ենք տրամադրել»,-ասաց նա։

Փաշինյանն ընդգծեց, որ նոյեմբերի 9-ի հայտարարության մեջ չկա որևէ մի գրառում, որով ՀՀ ինքնիշխանությունը որևէ ձևով սահմանափակվում է։ «Փորձ է արվում տպավորություն ստեղծել, որ նոյեմբերի 9-ի հայտարարության 9-րդ կետի համաձայն երրորդ կողմը պետք է ապահովի անվտանգությունը ՀՀ տարածքով։ Նման բան ընդհանրապես գոյություն չունի։ Հակառակը՝ գրված է, որ ՀՀ-ն է երաշխավորողը։

Նոյեմբերի 9-ի եռակողմ հայտարարության 9-րդ կետում չկա, որ ՀՀ-ի որևէ տարածքի պետք է դուրս լինի ՀՀ կառավարության վերահսկողությունից և որևէ երրորդ կողմ, մասնավորապես ՌԴ-ն այն պետք է վերահսկի։ Նման բան չկա, գոյություն չունի»,- ասել է Փաշինյանը։

Աղբյուր` Փաստինֆո