Փաստ ինֆո

Եթե նայենք, թե ինչ արագությամբ են զարգացումներն ընթանում, կարելի է պնդել, որ Բագրատ Սրբազանը Երևան մտնի 30.000 -50 000 շքախմբով։ «Փաստինֆո»-ի հետ զրույցում նման կարծիք է հայտնել հանրային կառավարման փորձագետ Արթուր Գևորգյանը։

«Գիտեք, անցած մի քանի օրերին, ամեն քայլափոխի ինձ հանդիպում են մարդիկ, որոնք ասում էին, որ պատրաստվում են գնալ, միանալ սրբազանին, ջուր տանել կամ աջակցել։ Սա միանշանակ խոսում է այն մասին, որ, ի տարբերություն դեռ 2 տարի առաջվա ընդդիմադիր տրամադրությունների, երբ բոլորը լուռ էին, այսօր արդեն բոլորը խոսում են այն մասին, որ իրենք պետք է գնան, միանան եկեղեցուն։ Երբ Տավուշից երթը շարժվում էր՝ մոտ 50 հոգի մարդ կար, իսկ այսօր արդեն խոսքը մի քանի կիլոմետրանոց ավտոշարասյան մասին է»,- նկատել է փորձագետը։

Բացի այդ՝ երթին դեռ չեն միացել բոլոր թեմերի նախաձեռնությունները, մինչդեռ, ինչպես նշեց Ա.Գեւորգյանը, յուրաքանչյուր թեմում, յուրաքանչյուր համայնքում նախաձեռնող խմբեր են ձևավորվում։ «Եթե անգամ 50-100 մարդով միանան՝ մենք կունենք նշածս պատկերը»,- ասել է մեր զրուցակիցը։

Միաժամանակ, հաշվի առնելով այն, որ Հայաստանի բնակչության 1/3-ը բնակվում է Երևանում, ովքեր իրենց անհամաձայնությունն ու դժգոհությունն արտահայտելուն են սպասում, ապա նրանք եւս երթին կմիանան Երևանում։

«Կարծում եմ, որ Երևանում նրանց կդիմավորեն ու կմիանան շատ շատերը, ամենատարբեր նախաձեռնող խմբեր, կուսակցությունների անդամներ»։

Գևորգյանի դիտարկմամբ, եթե ճանապարհին դիմադրություն լինի, սադրանքեր լինեն, ապա մարդկանց թիվը կանցնի 100 000-ը։ «Պետք է հասկանալ, որ անցած 6 տարիներին ընդվզման դետոնացիաները, ընդվզումների ճնշումները, որոնք ոմանց կարծիքով անցել է, իրականում չի անցել, կուտակվել է։ Սա Հայաստանի պատմության վերջին 100 տարվա մեջ՝ Սարդարապատից հետո, առաջին ոչ քաղաքական, այլ գաղափարաբանական, գոյաբանական պայքարն է, որի նպատակն է երկիր, պետություն ունենալը, որի նպատակն է պաշտպանել հայի ինքնությունը։ Այսինքն, մարդիկ ուզում են ունենալ հայրենիք, ուզում են ապրել անվտանգ երկրում, արարել և իրենց այդ իրավունքի համար են դուրս եկել ճանապարհ»,- ասաց Գեւորգյանը։

Հարցին, թե, օրինակ, ԱԺ նախագահ Ալեն Սիմոնյանն ասում է, որ չի ընկալում, թե ինչ պահանջ ունեն երթի մասնակիցները՝ նա պատասխանեց, որ Ալեն Սիմոնյանին, Փաշինյան Նիկոլին ու մնացած թավշյա ջատագովողներին պետք է հարցնել, թե իրենք 40 օր և ավելի, երբ քայլում էին՝ որևէ քաղաքական պահանջ ունեի՞ն, բայց հետո պարզվեց, որ եթե Նիկոլը վարչապետ չլինի՝ Հայաստանը վարչապետ չի ունենալու։

«Հիմա, իրենք պիտի հասկանան, որ սա քաղաքական պայքար չէ, սա գոյաբանական պայքար է ու եթե այն ենթադրելու է իմպիչմենտ, ապա իրենք թող հանգիստ նստեն տեղնեն ու սպասեն այդ օրվա, այդ օրը գալու է և ունենալու է այն տրամաբանությունը, որն անխոս յուրաքանչյուր հայ ուզում է էսօր հասնել, որի համար այսօր ոտքի են ելել բոլորը»։

Աղբյուր` Փաստինֆո