Փաստ ինֆո

Ես ուզում եմ հասկանալ, մենք կրոնապետությո՞ւն ենք, ինչո՞վ ենք հիմա զբաղված։ Քաղաքացին պետք է առաջարկ ունենա, երբ ինչ որ մեկը ասում է՝ ես սրան դեմ եմ, նա պետք է առաջարկ ներկայացնի, որն է առաջարկը։ Այս մասին ԱԺ-ում լրագրողների հետ զրույցում ասաց ՀՀ ԱԺ նախագահ Ալեն Սիմոնյանը։

Դիտարկմանը, թե շարժման մասնակիցները դեմ են միակողմանի զիջումներին և պահանջում են, որ ըստ միջազգային նորմերի իրականացվի սահմանազատումը, Սիմոնյանը պատասխանեց. «Ո՞րն է այդ միջազգային նորմը, որն, ըստ իրենց, խախտված է։ Ուզում եմ հասկանալ՝ մենք ինչի՞ մասին ենք խոսում։ Քանի՞ անգամ կարելի է նույն տրամաբանությամբ փորձել այն, ինչ-որ մենք արել ենք, նույն ձևի տարբեր դերակատարներով կրկնել ու փորձել նույն բանն անել։ Հասկացանք, նոր բան մտածեք։ Մեկ է, վերջում Վազգեն Մանուկյանին, Ռոբերտ Քոչարյանին, Սերժ Սարգսյանին, բանանի Միհրանին ... Էլ ո՞վ կար այնտեղ՝ բերելու են, ցույց տան, ասեն՝ էս են էս մարդիկ: Չի կարելի նույն տրամաբանության մեջ փորձել, ասենք մի քիչ դերակատար են փոխում, գնում են, ուրիշ դեմքով գալիս են»:

Դիտարկմանը, թե կարծում է, որ Բագրատ սրբազանի հետևում այդ ուժե՞րն են կանգնած՝ նա արձագանեց. «Լո՞ւրջ եք հարցնում»։

Հարցին՝ եթե հրապարակում 100-200 հազար մարդ հավաքվի, իշխանությունը կհեռանա՞, Ալեն Սիմոնյանը պատասխանեց. «Իսկ եթե եկան, էլի հավաքվեցին նույն 15-20 հազարը, մանդատները դնելու, դո՞ւրս են գալու քաղաքականությունից: Հայաստանում իշխանությունը պատկանում է ժողովրդին, երբ ժողովուրդը ինչ-որ պահանջ կներկայացնի, մենք կտեսնենք, որ դա ժողովրդի կողմից է: Քանակով չի՝ 2337: Այդպիսի իրականություն իրենց շուրջը ստեղծում են ընդդիմադիրները, իրենք իրենց ասածին հավատում են, իրենց ԶԼՄ-ներով տարածում են, դուք էլ գալիս եք հարցնում եք։

Ես վստահ եմ, որ ՀՀ ժողովուրդն ամեն ինչ շատ լավ հասկանում է, վտահ եմ, որ ՀՀ ժողովուրդը վստահում է սահմանազատման գործընթացին, գիտի, որ Հայաստանը պետք է խաղաղության մեջ ապրի, պատերազմ չի ուզում, չի պատրաստվում հներին վերադարձնել իշխանությունը, չի պատրաստվում կրոնապետության գնա, չի պատրաստվում եկեղեցու որոշ անդամներին դիտարկել որպես քաղաքական գործիչ, որն անընդունելի է, և հասկանում է, որ Աստված, եկեղեցին, հույզերը մենք ունենք, որպես քրիստոնյա մարդիկ, իսկ անհատները շահ են սպասարկում»:

Հարցին՝ արտաքին հետք տեսնո՞ւմ է այդ գործընթացում, նա պատասխանեց. «Տեսնում եմ տարբեր տեղերից, տարբեր ուղղվածություն, ֆինանսավորում ունեցող բլոգերներ, հիմնականում մեկ երկրում գտնվող մարդիկ հայտարարում են, որ միանում են այս շարժմանը։ Բնական է, տեսնում եմ, դա ակնհայտ է: Իսկ ո՞ւմ համար դա պարզ չէ»:

Աղբյուր` Փաստինֆո