Փաստ ինֆո

Կարծում եմ՝ հայկական օրակարգի դեմ աշխատող արտաքին թշնամի ուժերը և ներքին ուժերը նույնական են իրենց խոսույթում, ինչը ևս մեկ անգամ հաստատում է, որ այս իշխանությունները հակահայ օրակարգով են շարժվում, այսինքն՝ ադրբեջանական օրակարգով, հետևաբար, երբ երկրում հայտնվում է որևէ ուժ, որը իրական վտանգ է ներկայացնում նրանց իշխանությանը, նրանք համատեղ սկսում են թիրախավորել այդ ուժին։ Այս մասին լրագրողների հետ զրույցում ասաց փորձագետ Հովհաննես Ավետիսյանը՝ անդրադառնալով շարժմանը զուգահեռ իշխանական և ադրբեջանական քարոզչամեքենայի կողմից ՀԱԵ թիրախավորմանը։

Թե արդյո՞ք գործընթացը կհաջողի՝ փորձագետը նշեց՝ դա կախված է նրանից, թե որքանով է համակարգված և կազմակերպված, թե որքանով են ոչ բռնի տեխնոլոգիաները կիրառվում, քանի որ սա պետք է լինի խաղաղ անհնազանդությամբ իշխանություններին իրենց հենարաններից կտրելու գործընթաց։

«Եթե մենք, այսինքն՝ մարդիկ, որոնք մասնակցում են այս գործընթացից, չշեղվենք, ապա գործընթացը ստացվելու է, որովհետև այստեղ ճշմարտության և ստի հակադրությունն է՝ ինչպես Բագրատ Սրբազանն է խոսում։ Այստեղ կեղծիքի, շարունակական ստի, մեր հայկական շահերի դեմ գործող ուժերի և հայկականության հակադրումն է, մարդիկ, կարծում եմ, շատերը հասկանում են դա, շատերն են միանալու այս գործընթացին, որովհետև սա շատ սպասված գործընթաց է, տարբեր հակասություններ ունեցող մարդիկ և խմբեր են միանում, ինչը շատ ողջունելի է և հուշում է, որ շարժումն ունի լավ առաջնորդություն՝ հանձինս Բագրատ Սրբազանի»,- ասաց փորձագետը՝ հավելելով, որ սա լույսի պայքարն է՝ խավարի դեմ։

Աղբյուր` Փաստինֆո