Փաստ ինֆո

«Չգիտեմ ինչ ասեմ, պաշարված գյուղում ո՞նց կլինենք։Ամեն գյուղացուն 10-ը ոստիկան են բերել։ Բնակիչների մի մասն այստեղ են, որտեղ հավաքվել են սև բերետավորները, մյուսներն այլ մասում են գյուղի»,- «Փաստինֆո»-ին ասել է Կիրանցի երիտասարդ բնակչուհին՝ Գոհարը։

Երեխաների մի մասն այսօր դպրոց է գնացել. ասում է՝ նրանց զբաղեցնելու համար դպրոց են ուղարկել, բայց ոչ բոլորը։ Ըստ նրա՝ ով կարողացել է երեխային համոզել՝ ուղարկել է, բայց կան նաեւ ծնողներ, որոնք չեն կարողացել անգամ իրենց տրամադրել՝ երեխաներին համոզելու համար։

«Ինչ ասեմ, գյուղը պաշտոնապես ունի գրանցված 420 մարդ, ապրում է 360 մարդ, մոտ 300 մարդու բողոքը ճնշելու համար, գյուղ են բերել 3000 ոստիկան, ԱԱԾ աշխատող , պարեկ, ինչ համազգեստավոր ասես, որ չկա։ Մի գյուղացու դիմաց 10 ոստիկան են բերել»,- վրդովված ասաց բնակչուհին։

Արդյոք աշխատանքներ կատարվում են գյուղի այն տների հատվածներում, որոնք, ըստ քարտեզի, կարող է հանձնվեն Ադրբեջանին՝ հարցին ի պատասխան մեր զրուցակիցը նշեց, որ այդ մասում դեռ ոչինչ չի կատարվում։ «Չափագրում պետք է անեն, բայց դա չեն անում, դե հասկանում եք չէ՞, բնակելի տարածք է դա, տներ են, եթե այս փուլում ականազերծման ընթացքի մեջ են, դրան դեռ չեն հասել։Կոորդինատներ պետք է ճշտեն այդ հատվածում, իմ իմանալով, դա դեռ չեն արել, եթե թաքուն արել են տեղյակ չեմ»,- ասաց Կիրանցի բնակչուհին։

Նշենք, որ արդեն երկրորդ օրն է, ինչ Կիրանը պաշարված է ոստիկանների կողմից՝ գյուղի տարածքը ականազերծելու ու Ադրբեջանին հանձնելու համար։ Այսօր արդեն ՊՆ-ն պաշտոնապես հայտարարեց, որ ժամը 18:20-ին, Տավուշի մարզի Կիրանց բնակավայրից 2500 մ հյուսիս տեղի է ունենալու պայթեցման աշխատանք՝ 1 (մեկ) պայթյուն:

Աղբյուր` Փաստինֆո