Փաստ ինֆո

Որոշ դեպքերում անձանց ազատությունից զրկելու գործընթացը դրսևորվել է առերևույթ անհամաչափ ուժի գործադրմամբ և, բնականաբար, իրավասու մարմինները պետք է այս հանգամանքին բավարար ուշադրություն դարձնեն, նաև հետագայում պրակտիկան բավարար չափով կատարելագործելու համար։ Այս մասին ԱԺ-ում լրագրողների հետ զրույցում ասաց ՄԻՊ Անահիտ Մանասյանն՝ անդրադառնալով Կիրանցում անչափահասների բերման ենթարկելու դեպքերին։

«Անչափահասների հետ կապված էլ մենք մեկ շաբաթ առաջ հայտարարություն ենք տարածել, քանի որ նրանց տեսել ենք հիվանդանոցում։ Երեխայի լավագույն շահը պետք է նկատի ունենան ինչպես իրավասու մարմինները, այնպես էլ հավաքի կազմակերպիչները, ԶԼՄ-ները»,- ասել է ՄԻՊ-ը։

Հարցին, թե ծեծված քաղաքացիների հարցը բարձրացրե՞լ է ոստիկանության առջև՝ նա նշեց, որ այնպես չէ, որ բոլոր ահազանգերը ճշմարտացի են լինում, որովհետև շատ են եղել դեպքեր, երբ ահազանգի հետ կապված մեկնել են որևէ վայր և բռնության հետքեր չեն տեսել, քաղաքացին էլ հայտնել է, որ չի բողոքում բռնությունից։ «Բայց բազմաթիվ դեպքերում վնասվածքներ  արձանագրել ենք քաղաքացիների վրա, լուսանկարել ենք այդ դեպքերը և պահանջել պատշաճ քննություն, դրա մասին բարձրաձայնել ենք։ Այս դեպքերում էլ ունենք ահազանգեր, բայց չունենք բավարար ապացույցներ։ Ամեն դեպքում՝ այս պահին կարող եմ արձանագրել՝ առերևույթ անհամաչափ ուժի գործադրման հետ կապված՝ կասկածի տեսանկյունից»,- նշել է Մանասյանը։

Հարցին, թե ԱԺ ամբիոնում Վազգեն Մանուկյանի հասցեին արտահայտություններ են թույլ տրվել, թե «Երբ նրա քելեխն էին խմում հրապարկներում» և այլն, արդյոք իր մանդատի շրջանակներում ը չպետք է արձագանքեր և հայտարարեր, որ ատելության խոսք է քարոզվում՝ Մանասյանն արձագանքեց, որ լրատվամիջոցն էլ իր հետ կապված իրավունքի արժեքների հակասող խոսք է տարածել, որին ինքը երբևէ չի անդրադարձել։

«Հայաստանում այդ դեպքերն այնքան շատ են, որ չես էլ կարող արձագանքել այդ դեպքերին»,- արձագանքել է ՄԻՊ-ը։

Աղբյուր` Փաստինֆո