Փաստ ինֆո

ՀՀ գլխավոր դատախազ Աննա Վարդապետյանը տեղեկություն չունի՝ արդյոք հարցաքննվել են Հակոբ Ասլանյանին տրանսպորտում «հակայահ վիժվածք» ասելու գործով ձերբակալված Սամվել Վարդանյանին ՔԿ-ից ՁՊՎ ուղեկցած երկու ոստիկանը, որոնք միայնակ են թողել Վարդանյանին ՝ իբրև բնական կարիքները հոգալու համար, ինչին էլ հաջորդել է խոշտանգումը։

Մասնավորապես, Աննա Գրիգորյանը հետաքրքրվել է, թե արդյոք հարցաքննվել են այդ անձինք, ինչպես նաև՝ արդյոք հայտնաբերվել են դիմակավորված անձինք, ինչին ի պատասխան Վարդապետյանը նշեց՝ տեղյակ է, որ վարույթ է նախաձեռնվել, սակայն ինքը բոլոր վարույթներն անգիր չգիտի, չի կարող ասել, թե ինչ վարութային գործողություններ կան, ուստի՝ առաջարկեց գրավոր հարցում իրականացնել։ Պատգամավորն անդրադարձավ նաև լրագրողների նկատմամբ բռնության դեպքին՝ զուգահեռներ անցկացնելով, որ Արթուր Սուքոյանի դեպքում կալանք է կիրառվել, այլ դեպքերում՝ ոչ։

Մասնավորապես Գրիգորյանը բերեց Հակոբ Արշակյանի օրինակը, որը բռնություն էր կիրառել մեկ այլ լրագրողի նկատմամբ և որևէ իրավական հետևանք այն  չի ունեցել, բացի այդ հիշեցրեց լրագրողներ Անի Գևորգյանի, Հռիփսիմե Ջեբեջյանի նկատմամբ տեղի ունեցած բռնությունների դեպքերը։

«Շատ պարզ հարց եմ տալիս, եթե մի դեպքում կալանավորվում է, ապա մյուս դեպքում ինչո՞ւ չի կալանավորվում»,-հարցրեց Աննա Գրիգորյանը՝դիմելով դատախազին։

Վերջինս էլ արձագանքեց՝ նշելով, որ քննչական մարմինը ներկայացրել է կալանքի հիմնավորումները։

«Ըստ էության բոլորը տեսել են տեսանյութը, նախաքննությունը նման տվյալներ չի տիրապետում, որ միջանձնային հարաբերություններով է պայմանավորված, այլ կոնկրետ լրագրային որոշակի գործընթացներով է պայմանավորված»,-նշեց նա։

Ինչ վերաբերում է Հակոբ Արշակյանի դեպքին, ապա Վարդապետյանը նշեց, որ այդ ժամանակ ինքն իրավապահ համակարգում չի եղել, բայց տեղյակ է, որ լրագրողի կողմից սադրիչ գործողություններ են եղել։

«Էն ինչը, որ դուրս էր մնացել կադրից, թե ինչու էր պարոն Արշակյանը նման կերպ արձագանքել։ Այդ իրավիճակում արդեն լրագրողական գործունեություն չէ։ Նախորդ դեպքը, երբ անձը կալանավորված է, կապված է լրագրական գործունեության հետ և կոնկրետ անձը պիտակավորում է իրականացրել անձին՝ «սրբապիղծ» անվանելով։ Արշակյանի դեպքում միջանձնային, ոչ թուլատրելի բառակապակցության, պարոն Արշակյանից ներողություն եմ խնդրում, հայհոյանքին ի պատասխան վարքագիծ է եղել և միջանձնային հարաբերություններ»,-հայտարարեց Աննա Վարդապետյանը։

Աննա Գրիգորյանն էլ զարմանքով արձագանքեց. «Չափազանց զարմացած եմ ձեր այն հիմնավորումից, ըստ որի՝ լրագրողն ինչ-որ բան է արել, որի դիմաց Հակոբ Արշակյանը բռնություն է կիրառել, այսինքը՝ Դուք արդարացնում եք բռնությունը։  Արշակյանի բռնությունը չի կարող արդարացված լինել, ինչպես այլ բռնությունները»։

Աղբյուր` Փաստինֆո