Փաստ ինֆո

Փաստ է, որ մեր երեխեքին թունավորել են, հետո՝ վառել։ Դատաբժշկական փորձաքննության եզրակացության համաձայն՝ երեխեքից կեսն այրվելու ժամանակ ի վիճակի էին շարժվել, օգնություն կանչել, բղավել, իսկ մյուս կեսը՝ ոչ։ Նրանք ի վիճակի չեն եղել դուրս գալ, այլապես ինչպես է եղել, որ 15 հոգուց գոնե երկուսը չեն կարողացել փախնել։ Այս մասին հայտարարեց Ազատի զորամասի զինվորական կացարանում ողբերգական հրդեհի հետևանքով զոհված զինծառայողներից մեկի պապիկը։

Նման վարկած չի բացառում նաև զոհված տղաներից մեկի հայրը՝ Գաբրիել Կիրակոսյանը։

«Որ տղերքը գիտակից վիճակում լինեին, ոչ մեկը չէր զոհվի: 15 երիտասարդ տղա, ուղեղները միլիոնի տակ աշխատում էր, ֆիզիկականն էլ տեղը: Կենդանին, որ կենդանի է՝ մինչև վերջ կռիվ է տալիս։ Էդ 5 լիտրանոցով կիսով չափ լցված բենզինն իրանից ի՞նչ էր ներկայացնում, որ հրդեհ եղավ, ու առաջին վայրկյաններին տղերքը տեղներից չհելան»,- ասաց նա։
Ծնողները դժգոհություններ ունեն՝ գործի քննությունից, չեն հավատում պաշտոնական վարկածին, նշում են՝ գործը ծածկադմփոց է արվում։ Դժգոհություն է նաև դատաքննությունից և ծնողները հույս էլ չունեն, որ դատավորի փոփոխությունից ինչ-որ բան կփոխվի։

«Դատավորները մեր երկրում իրենց իրավունքները չգիտեն, եթե իմանային, գլխավոր դատախազը չէր կանգնի առաջին օրը Նիկոլի ասածին չեստ տար: Գլխավոր դատախազը իրավունք ունի Նիկոլին կանչի հարցաքննի գործի վերաբերյալ: Սուրեն Պապիկյան, ոչ մի տեղ չերևացիր: Մի գիշերվա ընթացքում 15 զոհ ես տվել, մի հայտարարությամբ հանդես չեկար: Եթե էնքան հիմար լինենք, ու պաշտոնական վարկածին հավատանք, դա իրանց չի փրկի»,-ասաց Հայկ Կիրակոսյանի հայրը:

Աղբյուր` Փաստինֆո