Փաստ ինֆո

Ն․ Փաշինյանը մեկնելու է Մոսկվա, բայց ոչ թե երդմնակալության առիթով, այլ՝ մասնակցելու է ԵԱՏՄ գագաթնաժողովին։ Հավանական է, որ հանդիպում ունենա Վ․ Պուտինի հետ։ Այլ բան է, որ ցուցադրաբար չմասնակցի մայիսի 9-ի շքերթին։ «ՓաստԻնֆոյի» եթերում ասել է «Դեմոկրատական այլընտրանք» կուսակցության նախագահ Սուրեն Սուրենյանցը։

Բանախոսի դիտարկմամբ, ցանկացած խելամիտ առաջնորդ պետք է ձգտեր աշխարհաքաղաքական բոլոր կենտրոնների հետ հավասարակշռված քաղաքականություն վարելուն։ Սակայն հիմա մենք չունենք հայ-ռուսական քաղաքական հարաբերություններ, Արևմուտքի հետ հարաբերությունները կառուցված են բացառապես հակառուսականության հենքով։ Հայաստանը տարածաշրջանի միակ երկիրն է, որը «փրկիչ» է փնտրում Արևմուտքում։ Հայաստանի նկատմամբ որոշակի արտահայտված անվստահություն ունի նաև Իրանը և որևէ տեղաշարժ չկա հայ-թուրքական հարաբերություններում։

Ըստ բանախոսի, Ադրբեջանը, կարծես թե դեմ չէ խաղաղության պայմանագրի ստորագրմանը, քանի որ կարողացել է դուրս մղել իր համար բոլոր այն խնդիրները, որոնք պատրաստվում էր լուծել ճնշման ճանապարհով։ Ըստ Ալիևի, մինչև նոյեմբերի համաժողովը, մտադիր է Հայաստանի հետ մի փաստաթուղթ ստորագրել, որից դուրս պետք է մնան դեմարկացիայի և դելիմիտացիայի հարցերը, կոմունիկացիների ապաշրջափակման հարցերը և այլն։ Փաստացի, այդ փաստաթուղթը ամրագրում է մինչև այժմ եղած Ադրբեջանի ձեռքբերումները, և որևէ անվտանգային խնդիր չի լուծում Հայաստանի համար։ Այդ պայմանագրով լեգիտիմացնելու են Հայաստանի դեմ բոլոր ճնշումները։

Քաղաքագետը նշում է, որ Ալիևի գլխավոր խնդիրը նոյեմբերի 9-ի փաստաթղթի 9-րդ կետն է, ավելի շուտ, տրանսպորտային հաղորդակցությունը։ Փաշինյանը ամեն ինչ զոհաբերեց, որպեսզի այդ կետը չկատարի, սակայն դա սխալ հաշվարկ էր։ Զոհաբերեց Արցախը՝ այն մտայնությամբ, որ կպոկի ռուսական ազդեցությունից, Արևմուտքն էլ կերաշխավորի մեր տարածքային ամբողջականությունը։

«Հայկական կողմի համար խնդրահարույցը սահմանազատումը Տավուշի կողմից սկսելն էր։ Միակ դիրքերն ու առաջնագիծը, որին չէին դիպել 44-օրյա պետրազմի հետևանքները՝ Ն․ Փաշինյանի ձեռամբ հանձնվում է։ Խնդիրը այն է, որ այդ գյուղերը հայկական վերահսկողության տակ են ճիշտ այնպես, ինչես դրանցից մի քանի անգամ մեծ հայկական տարածքներ գտնվում են Ադրբեջանի վերահսկողության տակ։ Ոսկեպարը, օրինակ, միջանցքի կարգավիճակ է ստանալու և անգամ տնտեսական կենսագործունեության իմաստով այս գյուղում ապրելը դառնա անհնար»,- ասել է Ս․ Սուրենյանցը։

Մանրամասները՝ տեսանյութում։

Աղբյուր` Փաստինֆո