Փաստ ինֆո

Հայաստանում կալանքները կտրուկ աճել են։ Ի վերջո, սա նախաքննական մարմինների կողմից ավանդական միշտ հայցվող, բայց դատախազության կողմից երբեմն հաստատվող, երբեմն չհաստատվող միտումն է, որ դատախազական հսկողությունը թուլացել է և դուք գրեթե ամեն ինչ հաստատում եք, որ գնա դատարան, դատարաններն էլ՝ հաստատում են, թե իսկապես մենք նման վատ հանցավորության վիճակում ենք։ Կներեք, բայց տպավորություն է ստեղծվում, որ կալանավորման աճը պատահմամբ, թե դիտմամբ, Ձեր պաշտոնավարման ժամանակի հետ է համընկնում։ Այս մասին ԱԺ-ում, դիմելով գլխավոր դատախազ Աննա Վարդապետյանին, ասաց ՔՊ-ական պատգամավոր Արսեն Թորոսյանը՝ ներկայացնելով կալանավորման վիճակագրությունները։

Պատգամավորը մտահոգություն հայտնեց առ այն, որ տպավորություն է, թե կալանքն օգտագործվում է որպես պատժի միջոց ու խոստովանքներ կորզելու միջոց։

«Արդյո՞ք ողջամիտ կասկած չի առաջանում, որ կալանքներն օգտագործվել են խոստովանական ցուցմունքներ կոզրզու համար ու դրանից հետո էն մարդիկ կալանքից բաց թողնվել»,- ասաց Արսեն Թորոսյանը։

Պատգամավորը նաև հիշեցրեց Տիգրան Առաքելյանի դեպքը՝ ՔԿ նախագահի և ՔԿ Երևան քաղաքի վարչության ղեկավարի կողմից իրեն խոշտանգելու վերաբերյալ․ «Օրինակ՝ իրենց մասով գործ կա՞, մեղադրանքներ կա՞ն։ Ինչու պաշտոնավարումը չի դադարեցվել։ Ուրիշների դեպքում կարծես թե ջանասիրաբար դա արվում է, ուզում եմ հասկանալ՝ բոլորն են հավասար օրենքի առաջ, թե որոշ մարդիկ ավելի հավասար են»։

Աննա Վարդապետյանը, սակայն, հակառակը՝ նվազում է արձանագրում կալանքների կիրառումների դեպքերով, քանի որ շատ ակտիվորեն կիրառվում է դատարանների կողմից։

«Դուք նշեցիք, որ դատախազությունը գրեթե ամեն ինչ հաստատում է։ Քննչականները շատ ուրախ կլինեին, եթե Ձեր այդ պնդումը իրականությանը համապատասխան լիներ, որովհետև դատախազությունը չի դակում քրեական գործերը և չի ուղարկում դատարան։ Դատախազությունն այն պատասխանատվությունը կրող մարմինն է, որը պետք է մեղադրանքի որակի համար դատարանում հաշվետու լինի»,- ասաց Վարդապետյանը՝ հավելելով, որ առնվազն կոռուպցիոն գործերով դատախազությունը փաստարկների պակաս չունի։ Վարդապետյանի խոսքով՝ եթե մեղադրանքը կառուցվի ինքնախոստովանական ցուցմունքի վրա, ապա մեղադրանքը դատարանում չի ապրի։

Աղբյուր` Փաստինֆո