Փաստ ինֆո

Անընդհատ ցանկանում են դատախազությանը բերել քաղաքական երկխոսության մեջ։ Չէ, մենք չենք մտնելու քաղաքական դիալոգի մեջ, փաստաբանների հետ խոսելու ենք միայն դատական նիստերի դահլիճում՝ ուղիղ եթերի տակ։ Այս մասին ԱԺ-ում հայտարարեց ՀՀ գլխավոր դատախազ Աննա Վարդապետյանը՝ պատասխանելով Գեղամ Նազարյանի հարցադրմանը։ ԱԺ պատգամավորը, մասնավորապես, նկատեց՝ մարդուն կալանավորմամբ պատժում են։

«Ձեզ չի անհանգստացնում այն, ինչ տեղի է ունենում Մամիկոն Ասլանյանի հետ։ Կարծում եմ՝ Դուք տեղյակ եք, թե ինչում են նրան մեղադրում և գիտեք, որ այն հանցագործությունը չէ, որ այդքան երկար մարդուն պահեն կալանքի տակ։ Միթե՞ այս ամենը խոշտանգում չէ Մամիկոն Ասլանյանի նկատմամբ։ Ձեզ չի անհանգստացնում, թե ով է այն աշխատակիցը, ով պարբերաբար պնդում է, որ Արմեն Աշոտյանը պետք է մնա կալանքի տակ։ Ձեզ չի անհանգստացնում, թե ինչու են կալանքի տակ մնում բլոգերներ Վազգենն ու Նարեկը, որոնց մեղսագրվող արարքն այնպիսի վտանգ չի ներկայացնում հանրության համար, իրենք էլ՝ այնպիսի ազդեցիկ անձինք չեն, ուստի, դրա համար կարող են քրեական գործ հարուցել, բայց ոչ կալանքի տակ։ Պարզվե՞լ է, թե ով է հանձնարարել նման կերպ ձերբակալել իրենց»,- ասաց Գեղամ Նազարյանը՝ հիշեցնելով նաև Լևոն Քոչարյանի նկատմամբ ոստիկանների բռնությունը, մինչդեռ, վերջինիս են այժմ մեղադրում ոստիկաններին ծեծելու մեջ, սա արդյոք չի անհանգստացնում պետության վրա։ Նազարյանը նաև մտահոգություն հայտնեց, որ թմրանյութերն արդեն դպրոց են մտել և չի տեսնում դա կանխարգելող գործողություններ, արդեն դպրոցական՝  8-րդ,9-րդ դասարանի երեխաների են բռնում, որոնք ոչ միայն օգտագործում են, այլ նաեւ՝ թմրամիջոց են վաճառում, մինչդեռ, ամբողջ ռեսուրսը ծախսվում է ակցիաների մասնակիցներին ձերբակալելու համար։

Պատգամավորը նաև անդրադարձավ գնդապետ Միհրան Մախսուդյանի՝ երկու որդիների կալանավորման մասին, որոնք կալանավորվել են՝ ճանապարհ փակելու համար, որը հայրենիքի համար ուղղված գործողություն է։

«Բա 2018թ հետ համեմատլիս՝ քանի փողոց փակողի դատեցիք, քանիսին կալանավորեցիք, քանի դուռ ջարդողին դատեցիք։ Բա ողբերգություն է տեղի ունենում, մարդն ինչ-որ ձևով ճանապարհ է փակել, ուղղորդված ինչ-որ մեկի որդիներին են կալանավորում»,- ասաց Գեղամ Նազարյանը։

Աննա Վարդապետյանն էլ արձագանքեց՝ նշելով․ «Ինձ անհանգստացնել եզրույթին չեմ կարող արձագանքել, որովհետև ինձ չի անհանգստացնում, ես գործառույթ ունեմ, որն իրականացնում եմ։ Տվյալ դեպքում, կալանքի մասին խոսելիս, ես նշեցի վիճակագրության մասին։ Դուք ընտրողաբար չորս դեպքի մասին խոսեցիք, բայց ունենք 2000-ից ավելի անձ, որոնք կալանքի տակ են գտնվում տարբեր ծանրության հանցագործությունների համար։

Ի՞նչով է պայմանավորված այդ դիսոնանսը, ինչի՞ համար մեզ չի հետաքրքրում մնացած անձանց ճակատագիրը։ Արդյոք Ձեր կարծիքով դատախազությունը կարո՞ղ է այդ աստիճան վճռորոշ խոսք ունենալ դատարանում։

Գլխավոր դատախազը վստահեցրեց՝ ներկա իրադրության մեջ դատարանները շատ քննադատաբար ու շատ մանրակրկիտ են կարդում բոլոր միջնորդությունները, որոնք դատախազությունը ներկայացնում է դատարան։
«Դատարաններն այսօր շատ ավելի ազատորեն կիրառում են մյուս բոլոր խափանման միջոցները, այդ թվում՝ տնային կալանքը և շատ ծայրահեղ դեպքերում են բավարարում կալանքը որպես խափանման միջոց ընտրելու վերաբերյալ միջդատական վարույթ իրականացնող մարմնի միջնորդությունները։ Բավարար է, որ Դուք վերցնեք նախորդ տարիները ու համեմատեք։ Սա ես որպես դրական ցուցանիշ եմ համարում»,-ընդգծեց Վարդապետյանը։

Աղբյուր` Փաստինֆո