Փաստ ինֆո

Ապրիլի 23-ին Տավուշում բերման ենթարկվելու ընթացքում գնդապետ Միհրան Մախսուդյանի նկատմամբ բռնություն գործադրելու դեպքի առթիվ նախաձեռնվել է քրեական վարույթ։ Այս մասին «Փաստինֆո»-ն տեղեկանում է ՔԿ-ից։

Հիշեցնենք, որ տավուշցիները խաղաղ ակցիաներ են իրականացնում՝ ընդդեմ Տավուշի գյուղերը Ադրբեջանին հանձնելու իշխանությունների գործողությունների։ Ապրիլի 23-ին տավուշցիները փակել են դեպի Բագրատաշեն տանող ճանապարհը։ Ոստիկանության ծառայողները բիրտ ուժի կիրառամբ բերման են ենթարկել քաղաացիներին, որոնց մի մասը ձերբակալվել է։
Բերման ենթարկված անձանցից մեկը գնդապետ Մախսուդյանն է եղել, ում նկատմամբ, ըստ ականատեսների, բռնություն է կիրառվել հենց ոստիկանների կողմից։ Մախսուդյանը տեղափոխվել է բժշկական կենտրոն։ Նրա վիճակը գնահատվել է միջին ծանրության, նա ունի գլխուղեղի ցնցում և ձեռքի կոտրվածք։

«Փաստինֆո»-ն տեղեկացել է, որ Մախսուդյանի՝ բռնության հետևանքով հոսպիտալացման հանգամանքով պայմանավորված ԲԿ-ն ահազանգ է ներկայացրել ոստիկանություն։ Ինչպես հայտնում են մեր աղբյուրները՝ Մախսուդյանին արդեն իսկ այցելել են ոստիկանության ծառայողներ և կազմել արձանագրություն։ ՀՀ ՔԿ մամուլի քարտուղար Գոռ Աբրահամյանը «Փաստինֆո»-ի հետ զրույցում հայտնեց, որ ոստիկանությունից փոխանցվել է բուժհաստատության կողմից ստացված հաղորդում՝ Մ․ Մախսուդյանի կողմից վնասվածքներով բուժհաստատություն դիմելու վերաբերյալ, այդ առթիվ նախաձեռնվել է քրեական վարույթ՝ ՀՀ քրեական օրենսգրքի 450-րդ հոդվածի 2-րդ մասի 7-րդ կետի (մի խումբ անձանց կողմից խոշտանգումը) հատկանիշներով։ Քննությամբ կպարզվեն հանգամանքները։

Հեղինակ՝ Իզաբել Սահակյան

Աղբյուր` Փաստինֆո