Փաստ ինֆո

Անվստահությունն է պատճառը, որ այն կարծը, որ Տավուշում առկա է՝ չի տարածվում հանրապետության մյուս համայնքներում, նաև Երևանում, որովհետև այն մարդիկ, որոնք կոչված են եղել ինչ-որ ձևով առաջնորդելու, ուղղորդելու ըմբոստացած ժողովրդին, ովքեր անհամաձայնություն են ունեցել, շատ վատ փորձառություն են ձևավորել, որը անվստահության մթնոլորտ է առաջացրել մեր ժողովրդի մեջ։ Այս մասին «Փաստինֆոյի» հետ զրույցում ասաց Իջևանի Սուրբ Ամենափրկիչ եկեղեցու հոգևոր հովիվ Տեր Աբել քահանա Քարտաշյանը։

«Ամենայն հավանականությամբ՝ Տավուշում սկսված գործողությունները կշարունակվեն։ Իհարկե, կշարունակվեն, այսպես հո չենք թողնելու, մենք հայրենատեր մարդիկ ենք, հայրենիքը մեզ համար մեր տունն է, մեր օջախն է, մեր ընտանիքն է։ Այս պահին գործողությունների պլանավորում դեռ չկա։ Մենք առաջնորդություն ունենք, մեր սիրելի սրբազանն է առաջնորդում, մենք էլ՝ բոլորս խոնարհությամբ սպասում ենք։ Ինչպիսին լինի այդ առաջնորդությունը՝ այդպես էլ կվարվենք։ Օրինակ, այսօր մենք պատարագ ենք մատուցել և սուգի, նեղության, դժվարության այս մթնոլորտը հատիկ-հատիկ ջարդում ենք մեր ժողովրդի, մեր հավատացյալ զավակների մեջ, որ հաղթանակը իրականություն դառնա և սրբերի բարեխոսությունն իրականություն դառնա»,- ասաց Տեր Աբելը։

Հարցին՝ հնարավոր է, որ մյուս համայնքերում էլ առաջնորդությունն ստանձնեն հոգևորականներ, ժողովրդին առաջնորդեն՝ հայրենիքի պահպանության համար, ինչպես Տավուշում՝ Բագրատ Սրբազանը, տեր Աբելը պատասխանեց՝ իհարկե, հնարավոր է։ «Մենք խնդիրները պետք է մեր մեջ ման գանք, ուրիշ տեղ պետք չի փնտրել։ Մենք Խորհրդային Միության մոռացության, անհավատության տարիների խարանն ենք հիմա մարսում, անհավատության, երբ քահանաներին ստորացնում էին, սափրում էին, մահապատժի էին ենթարկում։ Նաև սա է պատճառը, որ այսօր շատ հոգևորականների թիրախավորում են, ինչպես Բագրատ Սրբազանին։ Սա խորը անհավատության դրսևորումն է։ Այսինքն, մեր ժողովուրդը կարգված է քրիստոնյա լինելու, բայց դեռ քրիստոնյա չի։ Հիմա էլ հայտարարում են,

թե քահանաները չպետք է քաղաքականությամբ զբաղվեն, քահանաների ինչ գործն է... այդ խոսակցությունների հիմքում դրված է հենց խորքային անհավատությունը և անվստահությունը»։Տավուշում սկսված անհնազանդության կայծը կարո՞ղ է տարածվել ողջ երկրում ու լուրջ փոփոխությունների բերել հարցին ի պատասխան՝ քահանան ընդգծեց, որ նախևառաջ ամենամեծ փոփոխությունը պետք է լինի մեր ժողովրդի սրտում։

«Այդ փոփոխությունը արդեն սկսված է։ Ես շատ-շատ եմ լսել այն արտահայտությունը, որ այս վիճակից մեզ կարող է դուրս բերել միայն Հայ առաքելական եկեղեցին։ Այսինքն, թեկուզ մարդը դեռ իրեն հավատացիալ չի համարում, բայց ներքին վստահություն ունի, որ այդ խնդիրների լուծումները եկեղեցում կա։ Սրան զուգահեռ՝ շատ տարածված վիճակ է նաև այն, որ մարդիկ սկսել են գիտակցել, որ իրենք սխալ են արել։

Գիտեք, շատ վտանգավոր դրսևորում էր այն, երբ մարդը, օրինակ, վարչապետ է ընտրում՝ վստահություն ունենալով, որ ճիշտ է անում, բայց հիմա հասկանում է, որ սխալ է արել, բայց դեռ համարձակություն չի գտնում, որ խոստովանի։ Այսինքն, ինքը զգում է, որ սխալ է արել, բայց զղջում դեռ չկա, բավական է մի փոքր զրուցենք մեր սիրելի հայերի հետ, հայրական սիրով խրատենք, բացատրենք, որ եթե ընդունում է, որ սխալ է արել՝ կարող է ներողություն խնդրել Աստծուց, քանի որ այդ սխալն Աստծո առաջ ենք արել, քանի որ ցանկացած իշխանություն, որ ունենում է որևէ ազգ՝ դրան է արժանի եղել։ Այսինքն, մենք էլ հիմա սրան ենք արժանի եղել, որովհետև ընտրել ենք նրան։ Բայց մենք այս մարդուն ընտրելով կեղծիքը, սուտն ենք ընտրել ու, եթե հիմա խոստովանեցինք, ընդունեցինք, որ ընտրել ենք, որովհետև ատելությամբ ենք լցված եղել նախկինների նկատմամբ, ոչ թե նրան սիրելով, այլ ինչ-որ մեկ ուրիշի ատելու հաշվին՝ սա ամենասարսափելի հոգևոր պատնեշն է, որ հիմա քանդվում է։ Սա վերականգնելու համար ընդամենը պետք է խոստովանություն։ Եթե մարդը ուզում է ազատագրվի իր սխալից՝ չի կարող դա անել, քանի դեռ չի խոստովանել իր մեջ այդ սխալը։

Երբ խոստովանում ենք՝ Աստված վերցնում է այդ սխալը։ Երբ վերցնում է, միանգամից ամեն բան փոխվում է։

Մեր ժողովուրդը հիմա այդ ինքնախոստովանումի, այդ զղջումի շատ կարևոր փորձության մեջ է, ես համոզված եմ, մենք աստծո զորակցությունն ունենալու ենք, ու կարողանալու ենք հետ բերել մեր հզոր Հայաստանը։

Գիտեք, մինչև իրապես մինչև վերջ չտկարանա մարդը՝ չի գտնելու Աստծուն։ Մենք դեռ ազատ անկման փուլի մեջ ենք, մինչև վերջ՝ երբ ջարդված ու ընկած կլինենք, կտեսնենք, որ իրապես նաև սա են տալիս, մեկ ուրիշ բան էլ են տալիս, երրորդն էլ են տալիս, նոր հետո, կամաց-կամաց այդ գիտակցությունը կարթնանա»,- նշեց Տեր Աբելը։

Հարցին, թե մտավախություն չունի՞, որ անդառնալիության կետը կարող ենք հատել, որից հետո վեր բարձրանալն ավելի դժվար կլինի՝ նա պատասխանեց, որ այդ մտավախությունը միշտ կա։ «Բայց դա չի խանգարելու, որովհետև երբ մարդը այդ մտավախությունն ունենում է, իր գործողություններում շտապողականություն է լինում, էմոցիոնալ վիճակներում է լինում, ու դա սկսում է վնասել գործին, մարդը սկսում է անհամբերություն ցուցաբերել և սխալվելու հավանականություն է բացվում։ Շտապող, էմոցիաներով առաջնորդվող մարդու համար սխալվելու հավանականությունը մեծ է։ Մենք երեկ մի նման փորձառություն ունեցանք։ Երեկ, երբ բերետավորներ էին կանգնած՝ շատ խիստ դեմքով ու նրանք պատրաստ էին մեզ չգիտեմ ինչ անելու ու մարդիկ էլ թշնամաբար էին տրամադրվել՝ բավական էր մի քանի րոպե խոսել մարդկանց հետ ու տրամադրությունները փոխվեցին։ Այն կեղծ արժեքները, որոնց մասին խոսվում էր՝ «թավշյա, ոչ բռնի հեղափոխություն» և այլն... սրանք սատանայական հաշվարկներ էին, մեր ժողովուրդը խաբեության մեջ էր, իսկ հիմա մենք ճշմարիտ, սիրո վրա կառուցված շատ գեղեցիկ գործընթաց ենք կազմակերպելու»։

Հարցին, թե հիմա սպասե՞նք, որ գործողությունները նոր թափ են ստանալու՝ նա պատասխանեց. «Անհամբերությամբ և աղոթքով։ Մենք Աստծով ենք գործելու, որովհետև բոլոր ժամանակակից քաղաքական տեխնոլոգիաները և հաշվարկները այլևս պարպվել են ու վերջացել. Մենք Աստծով պետք է գործենք միայն։ Մինչև մարդը չի հասնում այդ կետին չի հասկանում, թե ինչպես պետք է գործի»։

Աղբյուր` Փաստինֆո