Փաստ ինֆո

Այն, ինչ հիմա տեղի է ունենում, դա թուրք-ադրբեջանական տանդեմի համատեղ թշնամական գործողություններն են ՀՀ-ի հանդեպ։ Ինչ-որ պահի կարող է լինել ցեղասպանական գործողություն, շրջափակում, ինչ-որ պահի կարող է այլ ձևակերպում ունենալ, բայց, ինչպես եղել է 100 տարի առաջ, այնպես էլ հիմա տեսնում ենք այդ տարբեր դրսևորումների սինթեզը։ «ՓաստԻնֆոյի» եթերում ասել է թյուրքագետ, պ․գ․դ․, պրոֆեսոր Ռուբեն Մելքոնյանը։

Բանախոսի դիտարկմամբ, իշխանություններին քայլեր են պարտադրել, որոնք նրանք անում են և դա մեկ բառով կոչվում է կապիտուլյացիա։ Իշխանությունները տեսականորեն ընդունելի են համարում ամեն ինչ բացի իրենց հեռացումից, ինչը կարող է շունչ տալ Հայաստանին։ Սրանք ուղղակի տարածքներ չեն, որոնք ադրբեջանցիները պահանջում են, դրանք տարածքներ են, որոնք դառնալու են հարթակներ Հայաստանի և Հայաստանի բնակչության դեմ թշնամական քայլեր անելու համար։ Կարևոր հանգամանքը այն է, որ սահմանազատման տրամաբանությունն է խախտվում։ Սահմանազատումը չպետք է վնաս հասցնի բնակչությանը և սահմանազատումը պետք է համաչափ լինի։ Որևէ երաշխիք չկա, որ այդտեղ հայտնված ադրբեջանցիները թշնամական քայլեր չեն անելու։

Թյուրքագետը նշում է, որ այս իշխանությունները այնքան թույլ են, որ պարտություններն ու ստորացումները թշնամին ամրագրում է սիմվոլիկ օրերին։ Քանի այս իշխանությունը կա՝ յուրաքանչյուր սիմվոլիկ օր բավական վախենալու է հայ ժողովրդի համար։ Ինչ վերաբերվում է Ալմա Աթայի հռչակագրով սահմանազատում իրականացնելուն, ապա 21-րդ դարում խոսել Ալմա Աթայի մասին՝ ինքնախաբեության գերդոզավորում է։

Անդրադառնալով օկուպացված Արցախից ռուսական զորախմբի հեռանալուն, բանախոսը նշեց, որ Կովկասը մի քիչ նեղ է և՛ Ռուսաստանի, և՛ Թուրքիայի համար, ուստի կողմերից մեկը պետք է հետ քաշվի, եթե ցանկանում են երկուսով տեղավորվել։ Այս դեպքում, ցավոք, կարծեք թե Ռուսաստանն է հետ քաշվում։ Սակայն, եթե գերտերությունը, այս դեպքում Ռուսաստանի պարագայում հեռու է Կովկասից, Մերձավոր Արևելքից, ապա դա հաստատ գերտերություն կոչվել չի կարող։

Մանրամասները՝ տեսանյութում։

Աղբյուր` Փաստինֆո