Փաստ ինֆո

Սահմանազատման գործընթացում շատ հարցեր կան ու հիմնական հարցն այն է, թե արդյո՞ք Ադրբեջանը հետ է քաշվելու օկուպացված տարածքներից, թե ոչ, մենք դրա պատասխանը չունենք։ Ադրբեջանցիներն ասում են՝ հետ չեն քաշվելու։ Այսինքն, մենք այստեղ զիջելով ինչ ենք շահում՝ չգիտեմ։ Այս մասին «Փաստինֆոյի» հետ զրույցում ասաց Սթենֆորդի համալսարանի քաղաքագիտության դոկտոր Արթուր Խաչիկյանը՝ ընդգծելով, որ մենք անընդհատ թուլություն ենք ցույց տալիս։

«Սա շատ աննախադեպ իրավիճակ է, սովորաբար նման իրավիճակներում պայմանավորվածություններ են ձեռք բերվում, գործընթացի համար հիմք է ընդունվում ու փոխզիջումներ են արվում։ Բայց հիմա, կամ մենք ուղղակի անընդհատ զիջում ենք ու հետ ենք քաշվում, կամ ինչ որ պայմանավորվածություն արդեն կա, ըստ որի՝ մենք արդեն շատ բաներ ենք զիջել, պարզապես մեզ չեն ասում դրա մասին, կամաց-կամաց, կտոր-կտոր են ասում, որ ժողովուրդը չվրդովվի։

Շատ անհասկանալի իրավիճակ է, հաջորդը լինելու են էլի 4 գյուղերը, հետո՝ Սյունիքի միջանցքը, որից հետո Հայաստան չի լինի»։

Հարցին, թե արդյո՞ք Իրանին տված երաշխիքների արդյունք է այն, որ այս փուլում դեպի Վրաստան գնացող ճանապարհի այն 4 հատվածները, որտեղ ճանապարհն անցնում է Ադրբեջանով դեռևս սահմանազատված չէ, քաղաքապետը պատասխանեց. «Գուցե խնդրենք Իրանը՞ մեր տեղը բանակցի, մեր սահմանները գծի, ի վերջո, այդ երկիրն ավելի վճռական է կարողանում մեր շահերը պաշտպանել և այդ երկրին ավելի լուրջ են վերաբերվում։ Իմ կարծիքով՝ արդեն պարզ է, որ մենք գաղութ ենք դարձել, արդեն պետություն չենք»։

Հարցին, թե արդյո՞ք Հայաստանի ու Ադրբեջանի միջև արդեն այնպիսի փոխվստահության մթնոլորտ է, որ կարող են մեր միջև սահմանին չլինել զորքեր, այլ լինեն սահմանապահներ, ինչպես Փաշինյանն է ասում՝ Խաչիկյանը նշեց, որ եթե մեր տարածքում ադրբեջանական զորքեր են, եթե շաբաթներ առաջ սահմանին կրակոցներ են եղել ու մեր զինվորներն են զոհվել, եթե Ադրբեջանը զորք է կուտակում մեր սահմանին ու անընդհատ զենք է ձեռք բերում՝ էդ զենքն ո՞ւմ դեմ է օգտագործվելու։ «Ո՞ւմ դեմ են գնած զենքերն օգտագործելու, Ռուսաստանի՞, Իրանի՞, ում դեմ, մենք ո՞նց ենք կարծում, ինչպե՞ս կարելի է այդքան ոչ խելամիտ լինել ու գլուխը գետնի տակ թաքցնել»։

Աղբյուր` Փաստինֆո