Փաստ ինֆո

«Հանրության աչքում պետք է ձևավորվի մի էլիտա՝ առաջնորդողների, որոնք պետք է համարվեն մահապարտներ։Սեփական անձը զոհելու պատրաստակամությունը ոչ միայն բառերով պետք է լինի, այլև՝ գործով, ու ժողովուրդը կգնա նրանց ետևից»,- այսօր նման հայտարարությամբ է հանդես եկել ՊԵԿ նախկին նախագահ Դավիթ Անանյանը՝ ավելացնելով. «ժողովուրդը ոտքի չի կանգնի , եթե չլինի առաջնորդություն։ Ասպարեզը փողոցն է , թիրախը՝ ԱԺ-ն»։

Նրա խոսքերով՝ ամբողջ խնդիրը այն է, որ համախմբվելը դժվար է։ Բազմաթիվ նոր հարթակներ կան, խորհրդակցություններ կան, քաղաքական տարբեր գաղափարախոսություն ունեցող մարդիկ հավաքվում և մտածում՝համախմբման հայեցակարգային կետերի շուրջ։

«Բոլորն իրենց մտքում ունեն վերջին մի քանի տարվա անհաջող փորձերը, երբ հնարավոր չեղավ հանրային ընդվզումը կապիտալացնել, բոլորը խիստ զգուշավոր են, այնպիսի կետերի շուրջ են ուզում համախմբվել, որ փորձը լինի մեկ անգամ ու հաջող»,- նշել է Անանյանը՝ ավելացնելով, որ բոլորն էլ գիտակցում են, որ գործընթացը պետք է շատ արագ տեմպերով գնա, որ հարցը ոչ թե ընտրությունների կամ արտահերթ ընտրությունների միջոցով իշխանափոխությունն է , այլ մի կարճ բանաձև՝ ասպարեզը փողոցն է , թիրախը՝ ԱԺ-ն։

Ըստ նրա՝ փողոցային շարժման մեր այսօրվա տիտղոսային ընդդիմադիր ներկայացուցիչներն այստեղ են պետք։ ԱԺ-ում նրանց ներկայացվածությունը վերաիմաստավորվելու է հենց դրանով։

«Մենք ասում ենք, որ իրենց մանդատները մեզ շատ պետք են ու իրենք պետք է դա ունենան։ Ավելի շատ փորձենք աշխատել քաղաքական մեծամասնության անդամների հետ։ Իրենց մեջ մարդիկ կան որ վախեցած են, մարդիկ կան, որ զղջում են, բայց այլընտրանք չունեն, որովհետև որոշակի կաշկանդվածություն ունեն, բայց փողոցային ճիշտ պայքարը և հանրային հարթակում գտվողների լայն կոնսոլիդացիայի պայմաններում հնարավոր կլինի շատ կարճ ժամանակում ամեն ինչ տանել իշխանափոխության, որն այսօր անհրաժեշտ է»,- նշել է Անանյանը։

Աղբյուր` Փաստինֆո