Փաստ ինֆո

Շատ կարևոր դրվագ կա Ոսկեպարում Փաշինյանի հանդիպումից, որ շատերը բաց են թողնում, այն է՝ Փաշինյանը խոսել է 90 տոկոսանոց պայմանավորվածությունների մասին, մինչդեռ նույնիսկ Փաշինյանի 100 տոկոսանոց պնդումները հաճախ իրականության մեջ հակառակն են լինում։

Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցն՝ անդրադառնալով Նիկոլ Փաշինյանի՝ Տավուշ կատարած այսօրվա այցին, և մասնավորապես Ոսկեպարի բնակիչներին տված խոստումներին, թե որոշակի պայմանավորվածություններ կան Ադրբեջանի հետ, որ չեն կանգնելու ճանապարհին, որ գետը չեն անցնելու։

«Որքանով մամուլում արտահոսքը թույլ է տալիս պնդումներ անել, այս դեպքում նա 90 տոկոսից է խոսել ու ասել, որ բանակցում են, սպասում են հակառակ կողմի պատասխանին։ Իմ մոտ տպավորություն է, որ որոշակի գործընթաց կա, որը ժամանակավորապես սառեցվել է»։

Քաղաքագետը նշեց, որ չի ցանկանում շտապել լուծումների մասին գնահատականներ տալ, քանի որ դեռևս չունենք նաև Ադրբեջանի արձագանքը, որպեսզի իմանանք, թե Փաշինյանի ո՞ր ասածն է համապատասխանում բանաացային գործընթացի տրամաբանությանը։ «Հիշում եք, 2 տարի առաջ Քիշինևի մի հանդիպումից հետո նա պնդում էր, որ համաձայնության են եկել 1975 թ-ի մի քարտեզի շուրջ, հետո պարզվեց, որ դա ընդամենը իր տպավորությունն է ու ոչ մի համաձայնություն էլ ձեռք բերված չէ։ Ես հակված եմ, այն գնահատականին, որ Փաշինյանը որոշակի պաուզա է վերցրել։ Ժամանակավորապես սառեցման ինչ-որ պայմանավորվածություն գուցե կա, բայց հնարավոր է, որ դրան Փաշինյանը միայն ձգտում է դեռ ։Ամեն դեպքում, բովանդակային առումով վաղաժամ եմ համարում ենթադրություններ անելը»։

Նա նաև նշեց, որ երկրորդ տարբերակն այն է, որ Փաշինյանը կարող է «զոնդաժ» անել։ «Այսինքն, շատ ավելի բարդ սցենար ներկայացնել, հետո ժողովրդի ճնշման տակ ավելի բարենպաստ լուծում առաջարկել ու ասել, որ իրեն հաջողվել է ինչ-որ բան փրկել, հատկապես, որ նա այսօր էլ խոսում էր այն մասին, որ ինչ-որ բան հանձնելու են, ինչ-որ բան փորձելու են պահել ու համարժեքության մասին է խոսել։ Չեմ կարող ասել, թե սա որ տարբերակն է, ամեն դեպքում նրա գործողություններում նոր բան չեմ տեսնում»։

Աղբյուր` Փաստինֆո