Փաստ ինֆո

ՔՊ-ական պատգամավոր Հակոբ Ասլանյանին «հակահայ վիժվածք» անվանելու համար ձերբակալված Սամվել Վարդանյանի նկատմամբ առերևույթ խոշտանգման փաստի առթիվ քրեական վարույթ առ այս պահը չի նախաձեռնվել, թեև երեկվանից ԶԼՄ-ները ողողված են դեպքի մասին փաստաբանների ահազանգերով։ ՀՀ ՔԿ-ից «Փաստինֆո»-ի հետ զրույցում ասացին, թե հաղորդում դեռևս չեն ստացել։

Հատկանշական է, որ Քրեական դատավարության օրենսգրքի հանաձայն՝ ԶԼՄ հրապարակումներն ինքնին հաղորդում են, իսկ քննիչն իր նախաձեռնությամբ կարող է վարույթ նախաձեռնել։ Այս դեպքում անգործությունը ոչ միայն ՔԿ-ինն է, այլև՝ դատախազությանը, որ առ այս պահը հանձնարարություն չի տրվել՝ վարույթի հարուցման։ Փոխարենը, շատ լավ հիշում ենք, թե ինչպես է, օրինակ, աննախադեպ արագությամբ քրեական գործ հարուցվում ընդդիմադիր գործիչների նկատմամբ՝ ԶԼՄ հրակարակման, անգամ՝ անանուն աղբյուրի հիման վրա մամուլի քարտուղարի զեկուցագրով, ինչպես օրինակ՝ Արմեն Չարչյանի գործն էր, իսկ ընդդիմախոսին ամենավերջին ձևով ստորացման եղանակով խոշտանգումը իրավապահները բնավ չեն տեսնում։ Թերեւս զարմանալ պետք չէ՝ անգամ «Freedom House»-ն է արձանագրել, որ դատախազությունը համերաշխ է իշխող ուժի հետ ու քրեական վարույթի չնախաձեռնումը փաստում է, որ դա տեղի է ունեցել քաղաքական իշխանության գիտությամբ, եթե չասենք՝ կազմակերպմամբ։

Հիշեցնենք, որ նախօրեին հանրային տրանսպորտում միջադեպ էր եղել Սամվել Վարդանյանի և ՔՊ-ական պատգամավորի միջև։ Երիտասարդը, տեսնելով ՔՊ-ականին, հանրային պարսավանքի է ենթարկել նրան՝ անվանելով նրան «հակահայ վիժվածք», ինչից հետո, ըստ հրապարակված տեսանյութի, Հակոբ Ասլանյանը հարվածել է երիտասարդին, թեև վերջինս հերքում է, որ խփել է՝ պնդելով, թե իբրև հրում էր պարզապես։ Դեպքի մասին հանրայնացումից կարճ ժամանակ անց իշխանությունների կողմից հրապարակային հայտարարություններ եղան՝ երիտասարդին պատասխանատվության ենթարկելու պահանջով, ինչից հետո երիտասարդը ձերբակակվեց՝ խուլիգանության կասկածանքով։ Պարզվել է, որ Հակոբ Ասլանյանը հանցագործության մասին հաղորդում է ներկայացրել, ինչի հիման վրա նույն օրը ՀՀ ՔԿ ԵՔՔՎ ծանր հանցագործություններ քննության բաժնում ՀՀ քրեական օրենսգրքի 297-րդ հոդվածի 1-ին մասի հատկանիշներով նախաձեռնվել է քրեական վարույթը: Երիտասարդը ձերբակալվել է։

Իշխանությունները, սակայն, տղայի ձերբակալությամբ չեն բավարարվել։ Տղային դաժանաբար խոշտանգել են երեկ՝ ՔԿ-ից ՁՊՎ տանելու ճանապարհին։ Խոշտանգման մասին փաստաբան Վարազդատ Հարությունյանը մանրամասներ է պատմել՝ նշելով․»Երբ ոստիկանության աշխատակիցների ուղեկցությամբ դուրս են եկել՝ ՁՊՎ մեկնելու համար, ընդամենը 1-1,5 րոպե հեռավարության վրա ոստիկանական մեքենան կանգնել է և ոստիկանության՝ քաղաքացիական հագուստով երկու աշխատակիցները հայտնել են, որ կարիք ունեն բնական կարիքներ հոգալու, մեքենայից դուրս են եկել, ինչից հետո ամբողջությամբ սև հագած դիմակավորված անձինք (Սամվելը երեք հոգու է ֆիքսել Վ․ Հ․), մեքենայից նրան դուրս են հանել՝ մի քանի մետր այն կողմ են տարել՝ խոտերի մեջ, նրան չոքեցրել, գլուխը հարվածել գետնին։ Ըստ երևույթի՝ ճակատի ուռած մասը հենց այդ մասից է եղել։ Սկսում են ձեռքերով հարվածել։ Այդ ամբողջ ընթացքում այդ գործընթացը ուղեկցվել է սեռական բնույթի հայհոյանքներով՝ վերջին խոսքերով։ Ընդ որում, ծեծողները պահանջելեն Սամվելից, որ կրկնի իր նկատմամբ սեռական բնույթի հայհոյանքները։ Բնականաբար նա հրաժարվել է։ Թքել են նրա վրա։ Այնուհետև՝ նրան՝ չոքած վիճակում, ձեռքերը՝ հետևի կողմից ձեռնաշղթայված, տաբատը իջեցրել են՝ փայտը կամ դուբինկան դեմոնստրատիվ պահել են ոտքերի արանքում, ուրիշ գործողություն չեն արելի, իհարկե, բայց պահել են ոտքերի արանքում՝ այդպիսով ցանկանալով ինչ-որ բան ցուցադրել, սպառնալ կամ վախեցնել»։ Ծեծը տևել է, ըստ Սամվելի, մոտ 3-4 րոպե, ծեծը ավարտելուց հետո քարշ են տվել, մեքենայի մեջ գցել, ինչից հետո քաղաքացիական հագուստով ուղեկցող ոստիկանները հայտնվել են, Սամվելը հևացել է, ոստիկաններն էլ ասել են՝ «քեզ ինչ է եղել, լավ էիր»»։

ՆԳՆ-ից «Փաստինֆո»-ի հետ զրույցում հայտնեցին, որ դեպքի առնչությամբ ՆԳՆ ներքին անվտանգության վարչությունում ծառայողական քննություն է կատարվում։

Հեղինակ՝ Իզաբել Սահակյան

Աղբյուր` Փաստինֆո