Փաստ ինֆո

Կասկածներ ունեն, որ տեղափոխման ժամանակ կարող է կրկնվել Սամվել Վարդանյանին խոշտանգելու դեպքը: Այս մասին այսօր վաղ առավոտյան լրագրողների հետ զրույցում ասաց Վարդանյանի փաստաբան Ռուբեն Մելիքյանը։

Նշենք, որ հանրային տրանսպորտում ՔՊ-ական պատգամավոր Հակոբ Ասլանյանին վիրավորած Սամվել Վարդանյանին այսօր ձերբակալության պահման վայրից տեղափոխեն Քննչական կոմիտե: Վարդանյանի պաշտպանների կոչով վաղ առավոտից ՁՊՎ-ի դիմաց հավաքվել էին ԱԺ պատգամավորներ, Երևանի ավագանու անդամներ, փաստաբաններ, որպեսզի ուղեկցեն այն մեքենան, որով Վարդանյանին տեղափոխելու են:
Մելիքյանը նշեց, որ նախօրեին ժամը 13.10-ից իր գործընկեր փաստաբան Վարազդատ Հարությունյանի հետ բարձրաձայնէլ են խոշտանգման փաստի մասին:

«Լրատվամիջոցների հաղորդումը հիմք է քրեական վարույթ նախաձեռնելու համար, սակայն մենք երեկ չտեսանք, որ նման վարույթ նախաձեռնվի: Ավելին, ՔԿ-ն հայտարարություն արեց, ասելով, թե մեզ չեն դիմել, դրա համար վարույթ չենք նախաձեռնել: Հատուկ չենք դիմել: Հիմա հիմք ունենք տարբերակված մոտեցում ցույց տալու համար հայտարարություն անելու: Վստահեցնում եմ, որ եթե հակառակ մի բան լիներ, ընդունելու էին լրատվամիջոցների հաղորդումը որպես հիմք:

Մենք վստահ չենք, որ հիմա Սամվել Վարդանյանին ուղեկցողները նորից բնական կարիքների հարց չեն ունենա և դրա արդյունքում ինչ-որ այլ դիմակավորված անձանց միջամտություն չի լինի»:

Նա ընդգծեց, որ փորձելու են երբ Սամվել Վարդանյանին դուրս բերեն՝ իրեն տեսողական դիտարկման ներքո պահել մեքենան, որը նրան ուղեկցելու է դեպի Պարույր Սևակի փողոց:

Մելիքյանն ասաց, որ առավոտյան արդեն տեսակցել են նաև Վարդանյանին։ «Նորմալ էր, գիշերը նորմալ է անցել, որևէ միջադեպ չի եղել: Դրանից հետո ԱԺ պատգամավորներ եկան»:

Անդրադառնալով ՔՊ-ական պատգամավոր Հակոբ Ասլանյանի պնդմանը, թե ինքն հաղորդում չի ներկայացրել ու չի էլ պատրաստվում ներկայացնել՝ Մելիքյանն ասաց, որ իրենք «լուրջ կիքս են թույլ տվել»։

«Սամվել Վարդանյանին ձերբակալել են 4.30—ի սահմաններում, էդ ժամանակ ՔՊ-ական պատգամավորը ասել էր որ չի ներկայացրել հաղորդում։ Հետո, նա ասում է, որ 19.00-ին իրեն կանչել են, ինքն էլ հաղորդում է ներկայացրել, հիմա հարց, բա ժամը 4.30-ից ինչի հիման վրա եք այդ տղային բռնել։ Այսինքն, հաղորդումից 3 -ժամ առաջ տղային բռնել էին, ես վստահ էլ չեմ, որ Հակոբ Ասլանյանը սեփական կամքով է հաղորդում տվել»։

Անդրադառնալով Վարդանյանի խոշտանգմանը՝ նա նշեց, որ սա չի տեղավորվում ոստկանական խոշտանգումների շրջանակում։ «Ինչի համար են ոստիկանները խոշտանգում, ցուցմունք կորզելու նպատակով կամ վիրավորում են, պատասխան վիրավորանք են ստանում՝ խփում են, այս անգամ մոտիվացիան ո՞րն է, ոչ մի մոտիվացիա չուներ ոստիկանությունը Սամվել Վարդանյանի նկատմամբ բռնություն գործադրելու, ոստիկանությունը մոտիվացիա չուներ։ Մոտիվացիա ուներ բացառապես ՔՊ-ն, հիշենք, որ Ալեն Սիմոնյանի գրառումը, որը ՔՊ-ի էջում դրվեց»։

Աղբյուր` Փաստինֆո